Ua faailoa lautele ai nei i se faasilasilaga ua saini ai le afioga i le Ao o le Malo, le faamautū o le fuafuaga a le malo e tuusaunoa le totogi o lafoga ma tiute mo oloa e aumai mai fafo e mafua i aafiaga o ni meatotino a aiga ma pisinisi i Upolu, ona o le faaletonu o loo iai nei le auaunaga a le eletise.
A tuusaunoa totogi o lafoga ma tiute o lona uiga e lē totogiina tau e masani ona faaee i luga o ia oloa pe a taunuu mai fafo e pei o masini ea mālūlū, o pusaaisa ma nisi ituaiga oloa e ola i le eletise ua faaleagaina ona o aafiaga mai le motusia o le eletise.
E lē gata o aiga ma pisinisi ua faasino tonu iai lea faamāmā avega, ae o loo aofia ai matāgaluega ma faalapotopotoga uma a le malo, o le faalapotopotoga o le malosi faaeletise, ma faalapotopotoga tuma’oti ua lesitalaina faaletulafono.
Ua mafai foi ona aumai ai nisi o oloa ua lisi mai e le komiti faufautua mo faalavelave matuiā e pei o afi eletise mautū ma afi feavea’i e ola i le kiso ma le penisini, o aseta mo le faaaogāina ma le tapu’eina o malosi’aga mai le lā, e aofia ai maa ma vaega e fetuutuuna’i ma fafagaina ai, vaega e gaosia ai le eletise mai le matagi, o maa faapitoa mo le tapu’eina o malosi’aga eletise, vaega e faatonutonu ai le malosi tau eletise ma isi meafaigaluega moomia e fesoota’i i afi faaleoleo.
Ua faailoa i le pepa o faasalalauga mai le komiti faufautua o galuega lavea’i i taimi o faalavelave matuiā, o oloa na faatauina mo le auina mai i Samoa i le aso 17 o Fepuari e oo i le aso 29 o Aperila ua aofia i le tuusaunoaina o lafoga ma tiute, ae e tatau ona taunuu i Samoa ia lē silia le aso 29 o Iuni o le tausaga nei.
Ua tapena foi e le komiti pepa faatumu mo talosaga uma e mana’omia lea faamāmā avega ma ua iai ma aiaiga i le pepa faatumu e tatau ona faamalieina.
Ua aiaia foi i le faamāmā avega lenei ni tupe toe faafoi poo refunds mo ni oloa tau eletise sa aumai i le atunuu mai fafo i le va o le aso 17 o Fepuari ma le aso 29 o Aperila ma ua faasino tonu lea i ni oloa a aiga, pisinisi ma faalapotopotoga tuma’oti ua lesitala faapea matāgaluega ma faalapotopotoga a le malo.
E iai foi aiaiga e tatau ona faamalieina muamua pe afai e iai se talosaga mo ni tupe toe faafoi.
Ua iai faasalaga ua aiaia mo i latou o le a lē usita’ia lenei poloa’iga.
E lata i le 200 nuu ma pitonuu o le motu o Upolu o loo aafia i le faaletonu o le eletise, o lea aofa’iga o loo iai aiga, o pisinisi, ma faalapotopotoga tuma’oti ua lesitala, ma matāgaluega faapea faalapotopotoga a le malo o loo faasino tonu iai le poloa’iga i le tuusaunoaina o le totogi o tiute ma lafoga.
