I le feiloaiga a le tamaitai Palemia ma le vasega o tusitala i le Aso Lua ua faailoa ai le talia ma le faamaonia e le Kapeneta o le fautuaga a le komiti o tauofoga poo le Tenders Boards, mo le faagasolo ai loa o galuega o le aualatele mai Tanugamanono agai atu i Siumu poo le Cross Island Road.
O se tasi lea o fuafuaga na faailoa i ni tausaga ua tuanai, ae o lea ua mautu le faaiuga e faatino loa ina ua iai ma le konekarate e gafa ma le fausia o le auala.
O se konekarate mai Saina e ta’ua o le China Civil Engineering Construction Corporation.
Sa fesiligia se finagalo o le tamaitai Palemia i le faatinoga o lea galuega ma ia saunoa ai, o se tulaga tāua tele le galulue faatasi o konekarate i Samoa e iai tomai ma agavaa i galuega faapea, ina ia mafai ona ausia tulaga maualuga e manaomia e mafai ai ona maua e kamupani i lo tatou atunuu ia galuega tetele.
Le afioga i le Palemia, Fiame Naomi Mataafa i le feiloaiga ma tusitala.
