Ua faamautu nei le filifilia o le afioga Lesatele Rapi Vaai o se tasi o faamasino sinia o le Faamasinoga maualuga a Samoa, e avea ma Peresetene fou o le Faamasinoga o Fanua ma Suafa, i lalo o aiaiga o le Tulafono fou o Fanua ma Suafa na pasia e le Palemene ia Tesema o le tausaga 2020.

Ua faailoa e le taitai o le Malo le afioga i le tamaitai Palemia, afioga Fiame Naomi Mataafa, le faia o lea filifiliga ina ua tuanai se faaiuga a le faamasinoga maualuga i le afiafi o le Aso Gafua o lenei vaiaso na teena ai le talosaga na faaulu e lē sa avea ma Peresetene, afioga Fepuleai Atilla Ropati, na talosaga ai i se poloaiga le tumau e faaauau ai pea ona ia tauave lea tofiga.

I le saunoaga faalauaitele a le Tamaitai Palemia, na faatoa maua i le afiafipo o le Aso Gafua, ua ia faailoa ai o le Aso Lulu le ogatotonu o lenei vaiaso o le a faatauto ai le afioga Lesatele Rapi Vaai, e avea ma Peresetene.

Le afioga i le Tamaitai Palemia, afioga Fiame Naomi Mataafa.