E 10 tausaga le feagaiga a le iunivesite o le Pasefika i Saute poo le USP ua mae’a sainia nei ma le faigamalo a Niu Sila.
O le maliega lenei o le a totogi ai e Niu Sila le tau e $35.8 miliona mo le 5 tausaga muamua ma o lea na fofoga mai e le Sui palemia o Niu Sila, Carmel Sepuloni ananafi a o iai i Fiti.
O loo faamoemoe o le faiga faapaaga lenei o le a fesoasoani ai i le iunivesite a o toe tau faatulai mai ai i le mae’a faamuta e le faigamalo a Fiti o lana fesoasoani i itu tau tupe.
O le iunivesite o le Pasefika i Saute o loo pulea faatasi e atunuu Pasefika e 12 ma o Ausetalia ma Niu Sila o lea lava na amata tutu malosi mo le iunivesite talu mai le 1968.
I le saunoaga a le Sui palemia o Niu Sila o loo ta’ua ai e Sepuloni o le sao o Niu Sila o se fesoasoani mo le iunivesite o loo aotauina ai le toatele o fanau Pasefika.
