O le aso 14 o le masina lenei o Oketopa ua faamautu mai e le palemia o Ausetalia, Anthony Albanese o le a faamae’a ai le toe faamalosia o le faanofoesea pe a aafia i le Koviti-19 ma o le a faamuta ai foi ma peimeni o livi, poo leave support payments.
O lona uiga o soo se tagata Ausetalia e faamaonia le aafia i le Koviti-19 o le a le toe manaomia ona faanofoesea mo le lima aso ma o se faaiuga ua faia i le mae’a o le fonotaga a le kapeneta aoao sa faia i le vaiaso talu ai.
O setete uma la ma teritori i Ausetalia o le a faatino ai lenei tulaga e fua ia latou foi tulafono. Pau le tulaga o loo faaauau pea e mo tagata faigaluega i siosiomaga e tele ai lamatiaga e pei o auaunaga tau le soifua maloloina ma nofoaga o tagata matutua. O le a manaomia pea ona faanofoesea i latou ia.
