Ua faamaonia mai le laasia e le Super Rugby Aupiki o se fuafuaga tele, i le mafai lea ona sainia e ni tama’ita’i taaalo lakapi se to’atolu ni konekarate mo se taimi umi lea ua sainia ai e oo atu i le faai’uga o le 2028.
O se ulua’i taimi lea ua faatino ai se konekarate umi faapea talu ona amata lenei taamilosaga.
Ma o i latou ua faamanuiaina e aofia ai Tara Turner, Maama Vaipulu ma se tasi o alo o Samoa ia Jaymie Kolose, o i latou uma nei ua sainia konekarate ma le ‘au a le Blues.
Na amata taaalo faatasi i latou nei mo le Blues i le tausaga e 2023 ma o nisi ua iloga taumafaiga talu ona taalo faapolofesa i le lakapi, ma ua molimauina foi le auai i taaloga faitaulia e pei ona avea ai ma sui o le ‘au tele a le atunuu le Black Ferns.
Ta’ua e le faia’oga ulu o le ‘au a le Blues, Willie Walker o le mafai ai ona faamautū o konekarate a i latou nei o se amataga lelei, ma o se faavae mautū lea mo le atina’eina o le taaloga i ona tulaga faapolofesa i le taaloga lakapi a tama’ita’i.
O le taamilosaga o le Super Rugby Aupiki, o se tauvaga i le va o ‘au e 4 mai i totonu o Niu Sila, e aofia ai Chiefs Manawa, o le Blues, Hurricanes Poua, ma le ‘au a le Matatū.
Faamauina o le taamilosaga o se tasi lea o fuafuaga i le atina’eina o le taaloga a tama’ita’i aemaise o le maua ai o tagata taaalo mo le ‘au a le Black Ferns.
Puna o Faamatalaga: https://www.rnz.co.nz/news/sport/591261/landmark-contracts-for-super-rugby-aupiki
