Ua toe faamautinoa e le palemia o Niu Sila, Jacinda Ardern i tagata o le atunuu le malosi o le sootaga ma le UK ma o le a faaauau pea e ui i nisi o tulaga o loo alia’e mai i Peretania lea ua faailoa ai e le Palemia o Boris Johnson lana faamavaega.
O le Aso Toonai talu ai sa iai Ardern i Egelani ma faamautu ai le mataupu e faatatau i le toe faaopoopo o le umi o le UK Working holiday visa scheme ma le alii Palemia o Johnson.
Saunoa le Palemia mai Sini i le po anapo ua ia vaaia le tulaga e pei ona iai nei Peretania ma o le a lē faia se faamatalaga i le taimi nei i le tulaga ua ai polokiki i lea atunuu. O loo iai Ardern i Sini ma sa fuafua e faia se fonotaga ma le Palemia o Ausetalia i le asō.
