O lea ua faamautū mai e le alii faia’oga ulu a le All Blacks, susuga Dave Rennie, lana ‘auvaa o le a latou galulue faatasi poo ana faia’oga lagolago mo le galuega o le a alo atu iai.
O Rennie lea ua ia tauaveina le tofi faia’oga ulu i le taimi nei mai ia Scott Robertson sa iai talu ai nei, ae o le a lagolago atu iai Mike Blair o le attack coach, o Faalogo Tana Umaga o le defence coach, o Jason Ryan o le forwards coach, ma Neil Barnes o le senior assistant.
O Jason Ryan sa galue foi o se faia’oga lagolago i taimi a o avea Scott Robertson faapea Ian Foster ma faia’oga ulu o le ‘au.
O Phil Healey o le a galue o le head of performance, ma na saunoa Rennie, o i latou uma nei ua matuā tele lo latou tomai ma agavaa i le galuega faafaia’oga mo le ‘au (very experienced and highly skilled coaching team).
O i latou uma nei ta’ito’atasi e iai o latou tala’aga ua iloga i le mafai ona latou faaaogāina tomai silisili o tama taaalo ma ‘au taaalo sa latou faia’oga ai, ma ua matuā naunau i latou uma e galulue ina ia maua lena tulaga taulau manuia mo le Olopeleki.
Na momoli e lē o loo avea ma Ofisa Sili mo se taimi lē tumau a le New Zealand Rugby, Steve Lancaster le faamālō ma le faafetai i galuega uma sa faatino e faia’oga lagolago ua lē o toe faaauau i o latou tofiga, susuga ia Scott Hansen, Tamati Ellison ma Bryn Evan.
Saunoa Lancaster, e telē se sao tāua na faia e i latou uma nei mo le tulaga manuia o le ‘au ma e mautinoa foi o loo tele isi tomai o le a latou faaauau ai pea ona avea ma faia’oga sili ona tomai.
O le susuga Tamati Ellison o le a avea ma faia’oga mo le Māori All Blacks.
Puna o Faamatalaga: https://www.1news.co.nz/2026/03/24/all-blacks-coach-dave-rennie-confirms-assistants/
