Ua faatulaga nei e le faamasinoga maualuga le aso 18 i le aso 24 o Mati o le tausaga fou 2024 e suesue ai molimau a leoleo e lagolago ai le moliaga o le taupulepule e faaoo le maliu, o loo molia ai Talalelei Pauga.
O le Aso Lulu o le vaiso nei na toe fofogaina ai le mataupu lenei i le faamasinoga maualuga mo le faamae’a o tapenaga e pei ona manaomia ai e le loia a lē ua tuuaia, faamaumauga o faamatalaga tusitusia a molimau a leoleo.
Ua faailoa e loia a leoleo i le faamasinoga ua mae’a ona faatino lea tulaga.
E toafitu molimau a leoleo o le a valaau e aofia ai nisi o molimau sa auai i le suesueina o moliaga o le taupulepule e faaoo le maliu lea ua faamaonia faasaga ia Malele Atofu Paulo ma Lemai Faioso Sione o loo tuli o la faasalaga i le falepuipui.
O loo tatala i tua Talalelei Pauga i aiaiga ma saini i le ofisa o leoleo e faatali ai le taimi ua atofaina e valaau ai molimau o lona faamasinoga.
