O le po anapo na faatino ai se feiloaiga a le Faalapotopotoga Soka a Samoa (FFS) ma le Kalapu Soka a le Mangere United. O se feiloaiga e feiloa’i ai le Komiti Faafoe o le FFS ma kalapu ma faasoa i le faamausaliina pea o sootaga, aemaise i alo ma fanau taaalo o loo iai sootaga i Samoa.
I se faatalatalanoaga ma le afioga i le alii Peresitene o le Faalapotopotoga Soka a Samoa ia Papaliiolemalietoa Leslie Samuel Petaia, na ia faasoa ai i le taua ma le naunautaiga i le tumau pea o le faigapaaga ma nei kalapu auā le atinaae o lenei taaloga
Faamauina foi e le alii Peresitene, o le sootaga ma Kalapu iinei i Niu Sila e le o se mafutaga faatoa amata, ae o le tulaga o loo silasila iai o le galulue soosoo tau’au lava ma kalapu soka i Niu Sila ina ia apoapo ma ia ola le taaloga i alo ma fanau.
Ae na saunoa faafetai le alii taitaifono o le Kalapu o le Mangere United ia James Kado, i le avanoa ua o latou feiloai ai ma le Football Federation Samoa (FFS) e faasoa manatu ma nisi o galuega faatino e atiae ai le taaloga i fanau pasefika.
Taua foi e le Taitaifono, o loo tatala le faitotoa o le Kalapu o le Mangere United mo soo se tasi o loo fia auai i taaloga soka.
Toatele sui o le kalapu ma tagatanuu Samoa na auai atu i lea faatasiga taua ma na faafetaia e le Kalapu faapea le FFS nisi sui ua fai ma sooupu o le kalapu o le Mangere United mo Samoa ia Tuifaasisina Lanuola Von Heiderbrandt ma Selesele Jordan Von Heiderbrandt, o nisi ua leva foi i lea taaloga i Samoa mo le la galuega faatino ua mafai ai ona iai lenei feiloaiga, aemaise o nai o tagatanuu Samoai le tuufaatasia o lea feiloaiga; taumafaiga e faamausali pea sootaga ma le Asosi Soka aemaise o le faalapotopotoga soka i Samoa.
Na faatautaia lenei faatasiga i le Mangere Centre Park.
