Ua faamatuu nei e leoleo mo le silasila a le lautele ata mai le CCTV o loo faailoa ai ni tagata se toafa o loo masalomia i le afi tele na sasao ane i le nofoaga o le scrap metal yard i Kalaiesetete i le masina talu ai.
E ui e le o manino lelei ata mai le CCTV ae o loo faailoa ai le kulupu lea o loo iai i le nofoaga i le taimi na sasao ane ai le afi. Pe a ma le 500 taavale sa iai i le lotoa na faaleagaina uma ai i le afi i le aso 17 o Aokuso.
Fai mai o ata o loo iloa ai o tagata faigaluega na o ese mai le nofoaga i le 25 e tea ai le fitu ae o loo vaaia ai ma tagata ia e toafa o savavali ane i le lotoa e tusa o le 35 minute e tea ai le fitu.
Fai mai leoleo e faamoemoe ia mafai ona ID ane e se tasi o le atunuu i latou ia e ala i ata ua faamatuu ane.
