O le tina mafatia o si teineititi 5 tausaga lea na lipotia atu ile vaiaso nei ua maliu ona o le koviti, ua ia faamatala ile au tusitala e tatau ona manatuaina pea si ana tama o se teineititi aupito i aulelei ae le nao se fuainumera o tagata ua aafia ile faamai.

O Ruby Isla Boston le igoa o le teineititi na uma lona ola ile lua vaiaso talu ona aafia ile koviti ma e lei agavaa foi ile taimi lea e faia sona tui puipui o le faamai. Fai mai lipoti a le 7 News o Ruby sa aafia seisi gasegase o le Cockayne syndrome type 2 ma sa le mafai ona savali pe tautala foi.

Ae fai mai si ona tina ole tolu aso ae lei uma lona ola sa vaaia ai le faaitiitia o lona malosi ma iu ai ina faamanava ile masini ventilator ma gata ai ma le tata o lona fatu. O loo agai se faamatalaga a le tina o Ruby ile faigamalo a Kuiniselani, fai mai a ia ole vave tatala o tuaoi o le setete ae lei oo ile taimi e agavaa ai tamaiti pei osi ana tama I tui puipui e puipui mai ai mai le koviti.

O le aso 10 o Ianuari na faatoa amata ai ona mafai ona faia tui puipui o tamaiti tai 5-11 tausaga le matutua ile setete ma na aafia Ruby ile vairusi o le koviti ae lei oo ile taimi o lana appointment e faia ai lona uluai tui puipui.

Ua iai se itulau ole GoFundMe ua faia, Her name is Ruby ao lumanai ai le aso faraile o le vaiaso fou o le a faamavae atu ai Ruby I ona aiga ma uo ile aoga amata sa aoga ai.