E taga eseese lagona faaalia o le tatou atunuu ina ua salalau i luga o auala o fesootaiga e pei o le api o foliga, le ata tusi a le alii tusiata o Kitiona Simei na faauu mai i le aoga tusiata a le ekalesia faapotopotoga kerisiano Samoa i Leulumoega Fou i le tausaga e 2016.
O nisi latou te faafetaia le taleni a lea alo o le atunuu ma le ata o le Faaola i luga o le satauro ma lana tatau le sogaimiti, a o nisi latou te teena ma lē talia.
Na faaalia e le tusiata o se tasi o Ositaulaga o le latou Ekalesia Katoliko na manao na te tusi lea ata, e avea o se faatomuaga o se tusi o loo tapena e le a’oga Telosia i Moamoa.
Na maua se fesootaiga ma Kitiona Simei ma ia faamatala ai i ana lava upu ona lagona i le ata na ia tusia.
O se faatalanoaga ma le alii tusiata o Kitiona Simei, ua faamautu nei i Aukilani i Niu Sila ma faaauau ai aoaoga i le sailia o lona faailoga o le Master i le tomai o le tusiata.
