Ua salalau i fesoota’iga televavave e ala i le api o foliga le tusi o loo saini ai le Minisita o Leoleo, falepuipui ma le toe fuata’ina le afioga Faualo Harry Schuster, ua tusi atu ai i le ta’ita’ifono o le vaega faaupufai o le faatuatua i le Atua Samoa ua tasi le susuga Laauli Leuatea Polataivao Fosi Schmidt, e tusa o le faai’uga a se vaega to’atele o faipule o le pati faaupufai, e aveesea ma faamuta le toe avea o le Minisita o Leoleo ma sui o le vaega faaupufai, faapea le tamaitai Palemia le afioga Fiame Naomi Mataafa, le Sui Palemia le afioga Tuala Tevaga Iosefo Ponifasio, ma minisita e aofia ai le tofa Olo Afoa Fiti Vaai, le tofa Leatinuu Wayne Sooialo ma le afioga Toeolesulusulu Cedric Schuster.
O le tusi a Faualo e avea ai ma sui o i latou uma ua faia iai le faai’uga a le faafaletui, o loo faailoa atu ai i le ta’ita’ifono e faato’ā mafai ona lē toe avea i latou ma sui aloa’ia o le pati ina ua ua latou lotomalilie e faamaui ese le toe avea ma sui auai.
O loo faailoa foi e Faualo i le tusi o le faai’uga ua faia e solitulafono ma solifaavae, ma o le faamasinoga e ono taunuu iai e aumai ai se faai’uga pe tusa ma ala o le tulafono le faai’uga ua latou fai.
E salalau ai i fesoota’iga televavave lea tusi i le Aso Faraile na te’a nei, ae faailoa i ata video mai le pati faaupufai le toe faafoi o taavale a le malo sa faaaogā e minisita lagolago e to’a sefulutolu ua faamuta e le Palemia o latou tofiga.
