O se tala faanoanoa i le taunuu mai i le faaiuiuga o lenei vaiaso ua maua ai lipoti o ni tamaiti aoga mai Sini sa savavali faatasi ane i le mae’a o le suega HSC ae lavevea ai i se taavale ma ua lipotia mai ua maliu ai se isi e 17 tausaga le matua.
Fai mai leoleo a Niu Sa Uelese o nai tamaiti aoga e toatolu sa savavali i le footpath ae aafia loa i le taavale le toalua o i laua ia , o le isi na uma ai lava lona ola i lea nofoaga ma le isi o loo i le falemai. O le isi na mafai ona oso ese ma le vaega na alu atu ai le taavale.
Fai mai le 9news i le taeao analeila o le tina e 90 tausaga sa aveina le taavale o loo faia nei lona taotoga i le falemai ona o manuaga i lona vae tulou.
Fai mai leoleo o se faalavelave faigata tele lenei aemaise le taimi o le tausaga ua tulai mai ai lea faalavelave.
O loo faaauau nei suesuega ma talia nisi faamatalaga faaopoopo mai leoleo.
O loo ta’ua i lipoti a le 7news o Carlingford na tupu ai le faalavelave i le taeao o le Aso Tofi.
