E 30 tausaga o se tamaitai ua faamaonia moliaga o faiga taufaasese i mataupu tau femalagaa’iga, immigration fraud. 

O Nurul Syahirah Binti Noor Azman o ia lea ua faamaonia moliaga e lima o le sapalaia o faamatalaga sese pe taufaasese foi i lalo o le Tulafono o Femalagaa’iga Immitgration Act ma ua maua lea tulaga i se suesuega sa faia a le Immigration NZ i le faaitu o Bay of Plenty i le tausaga 2020. 

O loo lipotia i le Televise tasi le faamatalaga a le pule o le Immigration Karen Bishop e faapea na o latou maua tagata faigaluega e malaga mai i le atunuu i le horticulture industry o loo unaia e talosaga mo tulaga e faapea o latou o tagata sulufai ina ia maua ai ni o latou visa faigaluega ma isi faamanuiaga. 

Fai mai e oo atu i le $600 tala Niu Sila le pili sa fai ane e lea tamaitai i tagata faigaluega nei e faatino ai ia talosaga le sa’o. Fai mai le pule ua alu ai ma le taimi o le aufaigaluega i le immigration i le mataupu lea, o taimi ia ma galuega sa tatau ona tuuina e iloilo ai talosaga faamaoni o loo tuuina atu i le ofisa.

O le mataupu a le tamaitai lea sa fofogaina i Aukilani ma ua tuu atu ia Fepuari o le tausaga fou e lauina ai lona faasalaga.