Ua amata tuli le faasalaga soloatoa i le falepuipui o le taulealea o Semisi Aliimatafitafi, ina ua faamaonia lona moliaga o le fasioti tagata faamoemoeina sa tetee iai.
O Aokuso o le tausaga e 2023 na tula’i mai ai lea solitulafono lea sa faaaogā ai e lē ua nofosala se laau malosi laitiiti o le ituaiga o le 25 calibre pistol na faamanu’alia ai le itu agavale o le fatafata o lē ua maliu, o ia lea o Ata Vaalua e iloa i le isi ona suafa o Oloa Tom.
O tolaulauga a leoleo i luma o le faamasinoga a o su’esu’eina molimau o loo faailoa ai, o lē ua maliu sa aga’i i le fale o se isi taulealea i le faamoemoe e faatau mai ai le fuālaau faasāina o le ‘aisa.
E taunuu atu le taavale a lē ua molia o loo tūtū i fafo o le fale lē ua maliu, ma sa tula’i mai ai loa se feupua’iga ma taunuu ai i le solitulafono na molia ai e leoleo Semisi.
O le lipoti a le foma’i na faia le ta’otoga faapitoa e sa’ili ai le māfua’aga o le maliu na faamaonia ai le ogaoga o le manu’a o lē ua maliu ma o le pulufana na aafia ai, o se ututau mai le laaumalosi sa umia e lē ua nofosala.
E lima isi moliaga o Semisi ua faamaonia e aofia ai le umia o se ‘au’upega tau laaumalosi e lē faatagaina i Samoa, umia o se ‘au’upega mata’utia, faapā o le laaumalosi, ma le umia o se ututau o se laaumalosi e solitulafono.
O le tama’ita’i loia mai se ofisa loia tuto’atasi o Fuifui Ioane na finauina moliaga a leoleo, ae o le tama’ita’i loia o Unasa Iuni Sapolu sa finauina le tetee a lē sa molia.
O le afioga i le tama’ita’i Faamasino o le Faamasinoga Maualuga, le afioga Leutele Mata Tuatagaloa sa seei i le su’esu’eina o moliaga.
