Ua faamaonia mai o le a taalo le alii kapeteni o le Toa Samoa, susuga Junior Paulo, i le taaloga faaiu lea o le a sue siamupini ai le Toa Samoa ma le Kangaroos a Ausetalia, ina ua uma ona lapata’ia e tusa o lana pue (lifting tackle) na faatino i le prop a Egelani o Tom Burgess.
Na tau faaletonu foi Paulo mai le taaloga na manumalo ai le Toa i le ‘au malosi a Tonga, peitai na toe apili le faaiuga ma manumalo ai Paulo ma toe faataga e talia i le taaloga o le semifinal ma Egelani lea na faia i le vaiaso talu ai.
Peitai o le taaloga lea ma Egelani na toe faasala ai foi ma faamalolo ai mo le 13 minute, peitai na toe foi atu ma ia taitaia ai lana ‘au i se manumalo sili ona mata’ina lea ua talagū solo ai le lalolagi, i se ‘au a le Pasefika e lei iai se faitauga a se isi e mafai ona ia faatoilalo le ‘au malosi a Peretania, peitai o lenei ua sao atu le Toa i le Final, ina ua manumalo ia Egelani i ‘ai e 27 i le 26 a Egelani.
O le tulaga na tau faaletonu ai Paulo, na lagona ai le leo o le lagolagosua mai le faiaoga a Egelani, Shaun Wane, faapea foi le alii taalo na sese i ai le pue a Paulo.
Saunoa Wane, ina ua faatalanoa e le aufaasalalau i le mae’a ai o le taaloga na toilalo ai lana ‘au, e ui i le mafatia o le alii faiaoga, ae na ia ta’ua, e manao ia iai Paulo i le taaloga faaiu, ma e iai lona talitonuga, o le lagona foi lena o le faiaoga a le Kangaroos a Ausetalia, susuga Mal Meninga, ina ia taalo le alii kapeteni na te taitaia lana ‘au i lea taaloga sili ona faitaulia.
Sa viivii foi e le faiaoga a Egelani le lelei o le faafoeina e alii laufali o taaloga i le lē vavevave e faasala tama taaalo i le tutuli i tua, ae sa tele lava ina ave i ai lapataiga ma toe faaauau i le taaloga.
Fai mai Wane, “Ou te manatu e lē manao Mal Meninga e misia e Paulo le taaloga lea o le a latou taaalo ai. E le faapena le auala o loo faafoe ai le Ipu a le Lalolagi lenei, ma e mananao tagata uma ina ia maimoa ma matamata i ni ‘au malolosi a Ausetalia faapea foi i le ‘au a Samoa. O lo’u manatu e lē tatau ona faamalolo le tama.”
Na lagolago e Burgess le manatu o le latou faiaoga, i le faapea mai: “E matuā tatau lava ona taalo Paulo i le final, e leai lava se mea matuiā na tupu.
“Ona pau lava o le itu ua alu i ai le pue,” o le tala a Burgess i le Fox Sports. “E lē tatau ona lē taalo ai fua mo se vaiaso ona o lena mea, e lē fetaui. E leai se mea o a’u na afaina”.
O loo faamoemoe le alii faiaoga o Matt Parish ina ia oo atu i le taaloga faaiu mo le sailia o le Ipu, ua avanoa mai le prop a le Sea Eagles le alii o Martin Taupau, peitai o le alii o Faamanu Brown o le a lē mafai ona taalo ona o le tulafono a Egelani lea e taofi ai se tama taalo e lē mafai ona taalo mo aso e 11 pe afai na feto’ai le ulu i se mea malō (head knock).
