Tusia : Maina Misa Fomai-Vai
Ua faamaonia e le Faamasinoga Maualuga le solitulafono o le fa’alemigao i le fa’amasinoga fa’asaga lea i itu tali e tolu e aofia ai le itu tali muamua Susuga Tuilaepa Sailele Malielegaoi, o le itu tali e lima, Lealailepule Rimoni Aiafi, ma le itu tali e ono, Maiava Visekota Peteru, e leai se faasalaga o tu’uina mai e le faamasinoga, ae o isi itu tali ua le faamaonia a latou solitulafono.
ITU TALI MUAMUA
O le faalemigao o le itu tali muamua Susuga Tuilaepa Sailele Malielegaoi o loo faaalia manino mai e le faamasinoga o le va o le aso 28 o Iulai 2021 ma le aso 27 o Aokuso 2021 o ia lafoga ua maualuga le afaina ai o le Faamasinoga e ala i ana faaiuga aemasie le aafiaga o Faamasino sa o latou faia ia faaiuga, ua aofia ai upu o sauaga ma le lemigao. O faaupuga na faia i lea aso e le i manatu le faamasinoga e tuuina mai atoa ae nao se vaega e aofia ai upu faapea….
“Ae o le malosiaga o le FAST ua tu’ufaatasia nei ma le Faamasinoga…ia ua na’o lo tatou o atu lava la ma tatou o i lalo…o atu i totonu ma o i lalo pe faiaina foi ona ua faapito le faaiuga i le vaega le la”
O nisi o faaupuga sa faia i le polokalame o le Good Morning Samoa i le aso 30 o Iulai 2021 o loo faapea…
“O le mea lea e mananao ai Fiame ma Laauli? Ia sau le Faamasino Sili ma avea ma tupu o Samoa? Matua mataga tele ia mea faapea”
O nisi o lafoga sa faia i faatalanoaga na faasalalauina i le TV1 ma isi auala o Faasalalauga i le aso 30 o Iulai 2021
” Ua iai mea ogaoga ia ua tutupu mai o gaioiga e faasagatau atu ai i le Ao o le Malo…ou te faapea atu fo’i o le faasagatau lava lea i le Palemene”
“E mafai lava ona faapea o lea ua tutu faatasi le taitaiga a le FAST ma le Faamasinoga….O fea la le amiotonu? E maua le amiotonu i lou tutoatasi e te le faaitu’au…ma afai e te iloa e iai lo lua sootaga ma se tasi ua tatau loa ona e faamavae”
Ua taua fo’i e le faamasinoga i lana faaiuga o le aso muamua o Aokuso 2021 i se faasalalauga tuusao sa faia i le Maota o le HRPP i Petesa sa faia ai e Tuilaepa lafoga faapea.
“O le mea lea ua tupu i lo tatou malo ua tatou vaaia gaioiga taufaaleaga mai i le Faamasinoga”
O le mea lea ua tupu nei ua faasausili le Faamasinoga….ua matua matautia lava ma ua faualuga”
“E manino lava o le fouvale le mea lea”
“Ua latou faaogaina le faatautoga le faatulafonoina ma le faavaea ma leai se taua mai le Faamasinoga Maualuga…o mea ia e tau o faiga faafouvale…o faiga ia e faaoga e milikeli..e iai atunuu e iai vaega ‘au (army) pei o Fiti…ae o fouvalega ia lea o loo faia e le Faamasinoga”
O le aso 5 o Aokuso 2021 na faia ai foi nisi faasalalauga o loo faifai ai i Faamasino o le Faamasinoga..
“Ou te fautuaina le Faamasinoga, le alii lea e Faamasino Sili aemaise le toalua lea…E leai a ma sesi o outou e mafai ona sola ise isi paneta”
“Soo se faamasino lava e faia ni mea faapena..o se faamasino fai togafiti leaga”
Atoa ai ma le aso 27 o Aokuso o loo maua ai upu taufaifai i le Faamasinoga…
“Ua le o toe iai se tutoatasi i le Faamasinoga”
Ua taua e le Faamasinoga i lana faaiuga o nei tala taufaaleaga ma lafoga ogaoga tele ua faamatala manino ai le faalemigao i le Faamasinoga o le Taitai o le HRPP..e ala i le tuuaia o le faamasinoga i lona tutu faatasi ai ma le FAST, o le faaogaina o upu e iai le fouvale, o faatogafiti, e faamatala ai Faamasino o le Faamasinoga, ua tuumaualaloina e le itu tali muamua le faatuatuaga o tagata i le tulaga tutoatasi, o le faamaoni, o le le faaitu’au o le Faamasinoga. O le vaai maualalo i le maualuga o Faamasino o le vaai maualalo foi lea i le Pulega a le Tulafono.
I ia lafoga e lei mafai i le taimi o suesuega a le faamasinoga ona saili le ua molia ise tulaga e puipui mai ai ia faamatalaga pe fesiligia foi le moni o ia lafoga. Sa ia faatoese i Faamasino ma le Faamasinoga ma manao e toe faaui i tua ia lafoga na ia faia, aemaise i se tulaga ua aveesea ai le faatuatuaga i le Faamasinoga ona o ia lafoga.
O loo maua foi i suesuega a le Faamasinoga le faalavelave ai o le itu tali muamua i le faataunuuina o poloaiga a le Faamasinoga, ua maua e le Faamasinoga sa iai faaiuga taua a le Faamasinoga na le taliaina e le Ao Mamalu o le Malo ma maua ai mau maumaututu sa faalagolago atu le faaiuga a le Ao Mamalu o le Malo i le fautuaga a le sa avea ma Palemia Tausimea i lea taimi le itu tali muamua lea. O loo ffaapea mai le Faamasinoga e faaono ave lea tulaga ma tulaga e faamaonia ai le solitulafono a le itu tali muamua i le faalemigao i le tulaga le faalavelave i poloaiga a le Faamasinoga peitai, e lei iai se poloaiga (Coercive Order) na faia faasaga i le Ao mamalu o le Malo ma e le avea foi le itu tali lua ma se vaega o le solia o se tulafono pe afai e l eai se poloaiga na tuuina atu.
E le gata i lea o le faamalosia lea e le itu tali muamua o le itu tali lona tolu (Tiatia Lima Graeme Tualaulelei) o le Failautusi o le Palemene i lea taimi e solia ai le faaiuga a le Faamasinoga na tuuina atu ai le manaoga, i lalo o lona malosiaga ina ia mautinoa e tauaofia le Palemene o Samoa i totonu o le 7 aso.
O loo faapea mai le Faamasinoga e talitonu sa faamalosia pe leai foi e le itu tali muamua le itu tali tolu e taofia le tauaofia o le Palemene i le ala na ia faia ai, ae o loo taofi le Faamasinoga i le mau, o le itu tali tolu e le i auai atu i se itu o itu nei e taofia ai le faia o se poloaiga Coercive Order faasaga ia te ia.
I lea la itu e le faamaonia na soli e le itu tali muamua se tulafono e ala i lona faamalosia o Tiatia e solia se poloaiga, pe afai e lei iai se poloaiga na tuuina atu.
Na maua i mau sa faatino e le itu tali muamua lea tulaga peitai o faaiuga o loo fesiligia na tuuina atu o ni faasalalauga (declarations) ae leo ni poloaiga( coercive orders).
O le tilotilo a le Faamasinoga e le’o faamaonia na solia e le itu tali muamua le tulafono o le Faalemigao i le itu o le Falavelave atu i poloaiga a le Faamasinoga (Obstruction of Court Orders)
O le isi tulaga o loo faailoa ai le tele o faaiuga a le faamasinoga ua solia e le itu tali muamua e aofia ai le tulaga o se tasi o sui o le vaega a le itu tali muamua sa faamalolo le tumau seia maea uma tagi o le palota faapea tagi o faiga palota laiti ma filifiliga. O le tuuaiga i ia poloaiga o loo faaalia ai le musu o le itu tali muamua e tauaofia le Palemene seivagana ua malie le itu tagi lua (Fiame Naomi Mataafa) e saofai le sui faaopoopo o se tasi o faipule i le maota.
O le le faia ai o lea tulaga ua ia manatu ai e tatau ona faaauau le Palemia tausimea seia maea uma tagi o le palota, faigapalota laiti ma tofiga ma filifiliga.
ITU TALI LIMA
E leo teena e le itu tali e lima Lealailepule Rimoni Aiafi lona faia ai o ni lafoga e pei ona ia faamatalaina i lana molimau faatautoina i le Faamasinoga i le aso 19 o Ianuari,2022. O ia lafoga na amata mai lava i le aso 25 o Iulai seia oo atu i le aso 18 o Aokuso 2021, e aofia ai le faaigoaina o le Faamasinoga o le ‘Faamasinoga fouvale’, lafoga ua ta’ua ai o le Faamasino Sili ma isi faamasino e toalua… “ua faamalaiaina” atoa ai ma le valaau atu e tatau ona faatoese faamasino ma tuua o latou nofoa…”o le faamasinoga fouvale ua latou faatulai le malo le faavaea”. O loo taua fo’i le lalafo atu o upu ma lafoga a le itu tali lima ma faapea ana le piopio faaiuga a le Faamasino Sili, ua leva ona falepuipui le ulugalii na faia le faatautoga.
O nisi lafoga a Lealailepule, ua faamaonia ai lona moliaga o le faalemigao i le Faamasinoga e aofia ai le faapea mai ua tutu faatasi le FAST ma le Faamasinoga ma agai mai ina ia faatoilalo le HRPP aemaise Tuilaepa. Sa ia faapea foi…”o lea ua agai atu le Faamasino Sili e fasioti latou”.
O le faaiuga a le Faamasinoga o loo taua ai na faapea atu Lealailepule o nei lafoga sa faia i le taimi o le vevesi ma le le mautonu, ma na te talosagaina ai le toe faafoi mai o ni lafoga ua aafia ai le Faamasinoga ma lona amiotonu, tutoatasi i ana faaiuga faapea foi lafoga ua taua ai le faaituau ma tutu faatasi ma le FAST e faatoilalo le HRPP.
ITU TALI ONO
O le faamaonia ai o moliaga o le itu tali lona ono lea o loo taua ai lana faamatalaga faatauto e leo agai atu e teena le mau na tu’uina atu i le Faamasinoga e le itu tagi.
O loo faailoa e le Faamasinoga i lana faaiuga lafoga na faia e Maiava Visekota Peteru e faapea ua malosi ma tu maualuga le Tamaitai Palemia o le itu tagi lua lea ona o loo tutu faatasi ma le Faamasinoga, e ala lea i a latou faaiuga faaitu’au, le faamaoni, ma sese.
Sa tagai le Faamasinoga i le tulaga ua iai le ao faamalumalu atu i luga o faasalaga uma lava na fuafuaina e ala lea i se maliega o le tutufaatasi, o lea maliega e lei faaogaina ele Faamasinoga, peitai o loo faailoa sa tagai i finagalo taua lava sa tuuina atu e le Palemia o Samoa faapea ai le Vaega Faaupufai o le FAST. Ua manatu o le taimi lenei mo Samoa e faatuana’i ai feeseeseaiga sa iai o Faigapalota. E mafai ai ona tutu faatasi Samoa ma talia le tele o luitau o loo feagai ai nei e pei o le Koviti19 ma suiga o le tau ma ua manatu ai e tatau ona faagata taualumaga o le mataupu i le faalemigao i le faamasinoga. O loo taua foi e leai se faiga faapolokiki o iai i tua o le faagata ai o le mataupu e pei ona tuuina atu e le Tamaitai Palemia ma le FAST.
O le manatu o le Faamasinoga i lana faaiuga o loo faapea mai ai… e ui i le taua o nei faamaumauga ma le faalemigao i le faamasinoga ua faamauina o lea ua iai faaiuga muamua ma ua tulai le malo. E le aoga foi i le faamasinoga ona toe foi ini mea ua maea ma ua uma. O faasalaga foi o le a faatupu ai pea le vevesi ma feeseesea’iga e pei ona ua maea vaaia le tulaga ogaoga ma le aafiaga ona o ia tulaga. Ua manatu le Tamaitai Palemia ma le FAST ina ia faataatia ia tulaga, e leai foi la se tulaga o le a teena ai e le Faamasinoga.
I le faaiuga la a le Faamasinoga o loo faamatalaina ai tulaga faapei o le tala lelei i le taimi umi o avea ai le itu tali muamua Tuilaepa Sailele Malielegaoi ma Palemia o le atunuu ua loa lana tautua ia Samoa, ma ina ua o’o mai faigata i le atunuu i le taimi o faiga palota sa tilotilo maualuga tagata uma ia Tuilaepa i lana taitaiga. O loo manino o le faavae le tulafono maualuga a Samoa, na ia tuuina atu i le Faamasinoga Maualuga e faauiga ma faatino tulafono uma a le atunuu. Ua mautinoa ai ma filifili ai le Faamasinoga o le Vaega Faaupufai o le FAST ua manumalo i le Palota…Sa manatu ai le Faamasinoga o le taimi tonu lea mo le Itu Tali Muamua Tuileapa Sailele Malielegaoi e faailoa ai lona tulaga faata’ita’i moni.
E ui i ia faaiuga a le faamasinoga e lei taliaina e le itu tali muamua ma agai ai e taufaifai i Faamasino ma le Faamasinoga.
I se isi tulaga o loo faapea mai le Faamasinoga i lana faaiuga o tulaga na faia e le Itu Tali Muamua e faamata e mafai ona iai se faasalaga faafalepuipui, peitai e tolu vaega na tagai iai le Faamasinoga ma alu ese mai ai mai se faaiuga faapena.
1. E leai se tasi nate fesiligia le taua o le auaunaga a Tuilaepa mo Samoa ma e agavaa ona patipati atu ma faailoa lea tulaga. Ua na’o se taimi puupuu lava ua pau ese mai ai i le faaeaea lea.
2. Ua faaalia lona manatu salamo i mea sese ma le mataga na ia faia ma talosaga e toe faafoi atu, ua ia faailoa e tumaualuga le tulaga faatuatuaina o le Faamasinoga.
3. O le maliega tutufaatasi ina ia maua le filemu mo Samoa.
Faaiuga a le Faamasinoga
We find the first, fifth and sixth respondents guity of contempt of court. In the very special circumstances we impose no penalty. We find the other respondents not guilty of contempt of court.
There will be no order as to costs.
