Ua faamaonia mai e leoleo ua maliu le tagata na lavea i le taavale i le asō i Glen Eden. O loo saila nei e leoleo le avetaavale o le taavale na lavea ai lea tagata ma ua faasā ai le vaega atoa o le alatele o loo siomia ai Glenmall.
Faamatala e se tasi o molimau le taimi o le faalavelave e faapea na vaaia le avetavale o le taavale o loo aofia i le mataupu lea ua ia avane i fafo le fana ma tu mai i fafo o le faamalama o le taavale ma agai ese loa mai lea nofoaga.
Saunoa foi se tasi o molimau na vaaia se alii i totonu o le taavale lanu uliuli lea o le Holden o liliu ane e lata i le fetaulaiga ala i le Glenmall ma fetaui tonu ma le taimi na kolosi ane ai se isi alii i le auala lea ma aafia ai i le taavale.
Fai mai le molimau na iloa lava ua aafia le soifua o sia tagata ona o le tulaga ese foi o le vaaiga na iai i le taimi o le faalavelave. E lei tu le tagata e ana le taavale ma sa mulimulitai iai le molimau lea o le tamaitai ma faamau i lalo le numera o le taavale.
O le taimi lea na vaaia ai e le molimau le faalala ane o se tamaifana a le alii avetaavale i fafo o le faamalama ma agai ese ai loa. O loo faamatalaina o lea alii pe a ma le 20 tausaga le matua mai iai le pasese i lana taavale o se tamaitai.
O loo faatalia nei se isi lipoti lata mai o lea faalavelave mai leoleo.
