Ua faamautu nei i se faaiuga a le Kapeneta se tasi o fuafuaga mo le unaia o le atina’e o oloa e auina i fafo mai lo tatou atunuu, o le faatuina lea o le Pulega mo Oloa Auina i Fafo poo le Samoa Export Authority.
O le tasi lea o galuega tele ma o se faamoemoega sa faataoto e le faigamalo, ina ia mautinoa le siitia maualuga o le aofai o oloa mai Samoa e ave i maketi i fafo.
Ua faailoa e le Sui Palemia o le fuafuaga e amata lea tapenaga i oloa mai le aufaifaatoaga ma le aufaifaiva e taimua ai le Faalapotopotoga o le Esetete Tausi, ae o le fuafuaga mamao a le Malo i le agai atu i le lumanai, o le a aofia uma ai oloa a le atunuu.
O loo faamoemoe lenei fuafuaga e sailia ma faamautu maketi o oloa mai Samoa e auina i fafo ina ia atoatoa ona lelei oloa ma faamausali feutanaiga ma itutino ma faalapotopotoga e fitoitonu ma aiaiga ma tuutuuga o le auina i fafo o ia oloa.
