I le feiloa’iga a le tamaitai Palemia le afioga Fiame Naomi Mataafa ma tusitala i le mae’a o le fono a le Kapeneta i lenei vaiaso ua ia faailoa ai le faamautū o se faai’uga faamaonia o le Faiga Faavae lea mo le Tetee atu i Soligatulafono e pei ona taulamua ai le Matagaluega o Faamasinoga ma Tulaga Tau Faamasinoga ma le Lālā o le Tulafono ma le Amiotonu (Law and Justice Sector).
O se faiga faavae tāua lenei i le uuna’ia ai le vave ona fofō faafitauli poo ni gaioiga, a o le’i oo atu i ni tulaga e avea ai ma solitulafono.
E aofia i lenei faiga faavae le faamalosia o auivi o Tulafono o loo aiaia ai soligatulafono, siitia o auala e taofia ai soligatulafono, atoa ai ma le faatūina o polokalame e tali atu ai i soligatulafono, ma auaunaga moomia e tulei ai le silafia lautele o le atunuu i tulaga ogaoga o soligatulafono.
O se galuega e galulue faatasi uma ai le atunuu atoa, e lē gata i le Malo, o Faalapotopotoga ma le Vaega Tuma’oti, ae faapea foi i le pulega mamalu a alii ma faipule i afio’aga ma alalafaga.
E faatāua foi le sao o Ta’ita’i o Ekalesia ma Ekalesia i le atunuu.
E lautele la lenei faiga faavae, ma afai e mapo faatinoga uma ua faatulagaina ma apo e itutino eseese o le a taulamua i le faatinoina o lenei galuega, o le a fesoasoani tele i le tatou tali atu i le faatupula’ia o soligatulafono i le atunuu.
