Ua faamaonia nei i le faasalalauga mai le afioga i le Ao o le Malo afioga Tuimalealiifano Vaaleto’a Sualauvi II, le filifilia o le tasi o sui faaopoopo mo nofoa o tina i le Palemene le afioga Toomata Norah Leota, o se sui sa tauva i le palota tele mo le nofoa o le itumalo o Anoamaa Numera 2.
O isi sui faipule e toalua mo nofoa faaopoopo lava o tamaitai i le Palemene le afioga Aliimalemanu Alofa Tuu’au ma Faagasealii Sapoa Feagia’i ua maea ona faamaonia lo la filifilia i le faasilasilaga mai le afioga i le Ao o le Malo ina ua mae’a ona faailoa le faitauga aloaia o le faigapalota laiti ia Novema o le tausaga na te’a nei.
I le fitu ai o tamaitai ua seei i tofi faipule o le Palemene ua tulai mai ai o le vaega faaupufai e puipuia aiātatau a tagata ua 22 nofoa ua latou umia, ae o le vaega faaupufai o le Faatuatua i le Atua Samoa ua Tasi ua 31.
O le a faato’ā iloa i le faaiuga o le palota laititi a Gagaifomauga Numera 2 o le a faia i le aso 3 o Iuni pe toe manumalo le Faatuatua i le Atua Samoa ua Tasi i le nofoa o lea itumalo e pei ona sa manumalo ai lo latou sui tauva i le palota tele ia Aperila o le 2021, pe o le a manumalo ai le vaega faaupufai e puipuia aiātatau a tagata. Ua 54 nei faipule o le paeaiga lona 17 a le Palemene o Samoa.
