E 26 tausaga o le alii o Leaututu Manuia Lameta Brown o le a malaga i Iapani, e faalautele ai lona tomai i tulaga tau malosiaga tau eletise.
Ta’ua e lea alii e faatolu ona talosaga mo se avanoa sikolasipi a le Ofisa o le malo o Iapani talu mai le 2021, ae o lea faatoa manuia ma ua sauni ai e tuua Samoa i le Aso Gafua o le vaiaso fou mo le umi e 2 tausaga.
O le faailoga o le Master i vaega tau malosiaga faaeletise lea o le a malaga atu ai lenei alii e finau ai i le Iunivesite maualuga o Kyoto i Iapani.
I le feiloaiga a tusitala ma Leaututu i le vaiaso nei na ia faailoa ai le agaga fiafia ina ua tali mai lana tusi talosaga lona tolu lea mo se avanoa sikolasipi e autovaa atu ai Iapani ina ia faalauaitele le silafia ma le malamalama.
O lea alii o loo ia umia le faailoga o le Bacherlor of Engineering mai le Iunivesite o Aukilani ma sa faigaluega foi i le Pulega o Malosiaga Faaeletise i Samoa nei.
O ia avanoa sikolasipi o loo ofo mai e le malo o Iapani e lē gata e faamausali atili ai le faiga paaga a malo e lua o Samoa ma Iapani, ae o se avanoa tāua mo fanau a le atunuu e faalautele ai le silafia ma le iloa i le galuega o loo finau ia tino mai.
