Ua faaamuia ma faamanuia le tamaitai Palemia o le malo Samoa i o tatou tagatānuu ua agavaa i le tulaga tagatānuu poo le sitiseni Niu Sila, e pei ona iai le tulafono taufaaofi o le sitiseni Samoa o le tausaga e 1982 ua pasia ma avea ma tulafono a le malo o Niu Sila.
O le saunoaga a le ta’ita’i o le malo i le feiloa’iga ma sui lagolago o le vaega faaupufai o le Faatuatua i le Atua Samoa ua Tasi i Aukilani i le faai’uga o le vaiaso lea na faamanatu ai ma le aso fanau o lea pati faaupufai, na afea ai i le saunoaga a le Palemia lea mataupu ma ia faailoa ai, o se faamanuiaga e lē tatau ona talitualimaina e i latou uma e agavaa iai.
Peitai o le malo tuto’atasi o Samoa e leai sana tala iai, ona e lē aiāina e le isi malo faai’uga fai a se isi malo e pei o Niu Sila.
Le afioga i le Palemia, Fiame Dr Naomi Mataafa.
