O le tatou motu i Savaii ua amata ai polokalame a le Malo e faamanatu ma faatāua ai le aso o tamā o Samoa o lenei tausaga 2024, e pei ona atoa i le tausaga nei le 19 tausaga talu ona faatāua ma faamanatu le aso o tamā le Father’s Day.
E ui e eseese atunuu ma masina e faamanatu ai le aso mo tuaa tamā, ae o Samoa o le Aso Sa lona lua o le masina o Aokuso i tausaga uma e pa’ū tonu iai.
O le saunoaga faamanuia ma le saunoaga tima’i a le Minisita o le Matagaluega o Tina ma Tamaitai Atina’e o Afioaga ma Aga Fesootai, na amata ai polokalame o le aso o tamā mo le motu o Savaii, lea sa faia i Salelologa i le Aso Lua o lenei vaiaso.
Se vaega o le saunoaga a le afioga Mulipola Anarosa Ale Molioo o le Minisita o le Matagaluega o Tina ma Tamaitai Atina’e o Afioaga ma Aga Fesootai, i le polokalame o le aso o tamā i Salafai.
O se tasi o polokalame a le Malo mo lenei aso faailogaina i Samoa i lenei tausaga, o a’oa’oga ma siaki faafoma’i e faia i Faasaleleaga Numera Tasi ma Faasaleleaga Numera Tolu i Savaii, ae o Upolu o le a faia lea polokalame i Aleipata Itupa i Luga ma Aleipata Itupa i Lalo.
O le a faatautaia ia polokalame e le Faalapotopotoga o aiga soifua maloloina a Samoa le Samoa Family Health, o le matagaluega o le soifua maloloina ma le faamalu o faalapotopotoga tuma’oti le SUNGO.
