Ua faamanino ma faamalamalama e le tamaitai minisita o tupe le autu ma le mafuaaga o le finagalo o le faigamalo fou e tatau ona faia se sailiiliga ma se su’esu’ega, i le tulaga sa faaaogā ai tupe a le Malo i le 40 tausaga talu ona seei le faigamalo sa iai, a o le’i suia i se faigamalo fou na te faatautaia le Sa o Samoa. O le tali a le Minisita le afioga Mulipola Anarosa Ale Molioo i le fesiligia e nisi o faipule o le itu agai, o lea ituaiga o sailiiliga faasu’etusi ua ta’ua o le Forensic audit, na ia fofola ai i le maota fono o le Palemene mafuaaga.
Mulipola: “O le faatinoina e le forensic audit ua mae’a ona pasiaina e le Palemene. Ua mae’a ona faamaonia e le Kapeneta, le faasalalauina o lea galuega mo se kamupani su’etusi faapitoa faavaomalo e faatinoina ona o loo mana’omiia le tuto’atasi o i latou o le a faatinoina lenei su’esu’ega. O lea faato’ā sui le malo i le 40 tausaga. E alagātatau ai ona faatinoina se sailiga faapitoa o atina’e sa faatinoina a o le’i suia le faigamalo. O lea faiga ina ia mautinoa ai le sologa lelei o atina’e mo le lumana’i. O poloketi ua faamaonia ma filifilia, e faatino ai le su’esu’ega faapitoa o le forensic, sa fua i ta’iala nei:
1. Tulaga o loo iai le atina’e i le taimi lenei, ua tele tupe ua alu ai ae lē o mafai ona faaaaogāina mo se manuia o se isi.
2. Tulaga o loo alia’e mai ai pea faalavelave ona o le lē lelei ona fausia o nei atina’e.
3. Tulaga na faatatope ai le fausuiaina o le atina’e, le tau o le galuega e tatau ona iai, ma le telē o le tupe faaaluina ma sa mafai ona sefeina pe ana fuafua lelei ma faatino i le taimi e tatau ona faatino ai.
4. Aafia le atina’e ua gau ma ua lē mafai ona toe faaauauina ona totogi ana aitalafu ae sa mafai ona aloese mai nei faai’uga i le amataga.
5. Aafia le atunuu e ala i le maliliu o tagata ona o le lape o le faatinoina e le malo o ona tiute.
6. Aafia le aseta ma ua lē toe faaaogāina, writeoff ona o le lē tausia lelei e i latou sa faamoemoeina latou te tausi ma faapelepele e pei lava o ni a latou meatotino.
7. Faatinoina se fesoasoani e ala i le malo e tufa ni tupe mo se faamoemoe a le malo ae lē faavaea.”
O le saunoaga foi a le Minisita o tupe na ia tali ai i finagalo o faipule o le itu agai na toe afea ai le mataupu i le vaalele ua toe faafoi. Na saunoa le afioga Mulipola Anarosa Ale Molioo, o se faai’uga alofa na faia e le faigamalo ona e le gafatia ona faagaioi le vaalele tele 737 800 i fuafuaga o le tala o le tupe.
