Ua manino tonu le mata o le vai i le autu ma le auga o aute o le faigamalaga sa auai atu iai le afioga i le Minisita o Faatoaga ma Faigafaiva, le afioga ia Hon Laaulialemalietoa Leuatea Polataivao Fosi Schmidt ma nisi o sui o le atunuu i totonu o Saina.
E toasefulu le aumalaga e aofia ai sui o le malo ma sui o faalapotopotoga ma pisinisi tuma’oti.
O le vaalaaulia faaapitoa sa valaaulia ai le matagaluega o suesuega faasaienisi le SROS i le malo tele o Saina i le itumalo o Yunnan auā o le itumalo lea o loo faipaaga ma le Matagaluega o Faatoaga ma Faigafaiva e ala i le faatupulaia o fua o fualaau’aina, fua o fualaau taumafamata, fualaau faisua, lafumanu ma lafumoa ma polokalame uma lea o loo faasolo i Samoa i le taimi lenei.
Sa auai ai foi le taitaifono o le SROS le susuga ia Tuisamau Sulamanaia Montini Ott, faapea foi le susuga i le alii pule fou o le SROS le susuga ia Fiso Dr Fiame Leo ma nisi o le aumalaga o loo iai a latou oloa e pei o le vai, o i’a, o le nonu ma le tele o oloa gaosi ua leva ona tapena e le matagaluega o le SROS.
O le faaaliga tele sa faia i totonu Yunnan e faia i tausaga uma ae o le uluai taimi lenei faatoa maua ai le avanoa e ave ai oloa gaosi a Samoa ua leva ona tapena e le SROS ina ia faafeiloai ma faailoa i totonu o le malo o Saina.
E tasi lava le auaunaga ma le faamoemoe o lenei malaga ina ia maua ni maketi e amata ona atinae ma gaosi ai oloa ma ave iai, ina ia maua ai ni tupe fou mo le tatou malo.
O le falaoamata ulu, falaoamata fa’i, falaoa mata talo, o le fagu whisky e gaosi i le talo o mea e fufulu ai lima, o mea fai ti, o vanila o le vai, faapea ma i’a, o sukalaki e gaosia i le koko fapea ma le kofe ma le tele o oloa o le i lalo o le faamalumalu a le SROS.
O loo ofaatasi lenei faamoemoe ma se tasi o polokalame o loo tapena e le malo o le Export Authority, o se tulaga e fau ai le apefai poo le auala laupapa e tua iai le au exporters a Samoa.
E le gata i oloa o loo la’u i Saina ae o loo maua foi le avanoa o loo la’u mai ai le oloa i Niu Sila nei.
O le aotelega lava o le malaga ia maua maketi e maua ai ni oloa fou, oloa faa’aisa ma oloa felesi.
Lona lua, ua maua le avanoa e feiloa ai ma le kamupani tele o loo fagotaina le ogasami o le atunuu, lea o loo silia atu i le 60 i le 70 vaa fagota o loo latou fagotaina le ogasami o le Vasa Pasifika.
O i’a ia o loo ao mai i totonu ma fafao i container ma aumai i fafo ma o loo ta’u ai o i’a a Samoa.
Na malaga i Saina ma ave le apakoa sili ona lapoa, sa poipoi ma fai ai le sasimi ma le poke i le taimi o le faaaliga.
O le itu tāua o lenei faaaliga o le faalauiloa lava o Samoa.
O loo taumafai lava ia saili le tele o maketi e auina mai ai le tele o oloa a Samoa ina ia maua ni tupe fou mo le malo ma tagata lauetele o le atunuu.
