Ua faamanino e le Komesina o leoleo mafuaaga ma aiaiga ua faamatuu ai se Malu o le Malo e vaaia le saogalemu o le taitai o le Itu agai le susuga Tuilaepa L Sailele Malielegaoi.

Ua faailoa lautele i se finagalo o le Komesina le susuga Auapaau Logoitino Filipo, o aiaiga tau protocol mo puipuiga o le saogalemu e leai se leoleo e vaaia le taitai o le Itu agai, ua na o le afioga i le Ao o le Malo ma le Palemia.

Peitai e iai aiaiga faaletulafono e avanoa ai sea auaunaga pe afai ua lamatia le saogalemu ma o le mafuaaga lea o le faaiuga e faavae i se talosaga na tuuina atu e Tuilaepa mo se leoleo e vaaia lona puipuiga.

O aiaiga o lea faaiuga e na o le 9 i le taeao e oo i le 5 i le afiafi o Aso Gafua e oo i le Aso Faraile e iai le leoleo mo le taitai o le Itu agai, ae o faaiuga o vaiaso e le maua ai lea tautua tau puipuiga o le saogalemu seia vagana e iai se sauniga e valaaulia ai le susuga Tuilaepa.

O le tasi o aiaiga e na o le 3 masina o le a faia ai lea tiute o le leoleo e faia lea galuega.

O lona uiga e toe iloilo le faaauau ma le faamuta loa pe a mae’a le 3 masina.