Ua toe avatu se faasilasilaga faamanatu a le Matagaluega o Aoga i puleaoga uma o aoga tulagalua ma kolisi uma i Samoa ina ia toe manatua taiala ma faiga faavae a le Matagaluega e tusa ai o taimi o faiga suega a le fanau aoga.
I luga o le fesootaiga televavave a le facebook o loo toe faasalalau ai lea faasilasilaga o loo sainia e le sui ofisa sili a le pulega, o loo toe logologo faamanatu ai i puleaoga uma, “E le faatagaina le sasao o meaai i tamaiti aoga mo faiga suega.”
O se tu masani lea sa sau a’i i taimi ua mavae, aemaise lava i taimi o faiga suega mo National Exams a nai fanau i aoga tulagalua e sue ai tamaiti o vasega o le Tausaga 8 e saili avanoa i luga i kolisi ma isi aoga maualuluga.
O le tele o aoga, sa sasao meaai e faatino mai e taimaiti o le Tausaga 7, ma e le o ni saoga meaai laiti sa masani ona fai. Atonu o le agaga o le fia faimea lelei o matua sa faatino ai, ae i na vaitaimi e lagona ai foi ma le siuleo o le oi ma le mafatia o nai isi matua, ona o le tetele o nei saogamea aemaise pe a le lava le faasoa.
Peitai ua iai se suiga lea ua faamamafa mai nei, ua toe faamanatu ai i pulega uma a aoga, e le tatau ona toe faaee atu lea avega i luga o fanau ma o latou matua. O se tasi o taiala ua lagona ai foi le faamama avega i aiga i na vaitau o suega a fanau.
Mo le silafia o faiaoga uma o aoga e totogi faatasi i lalo o le paketi a le malo mo le matagaluega o aoga, ae e tofu lava le aoga ma lona komiti faafoe, lea e tele ina faatulaga ai e komiti faafoe nei nisi o faatulagana faaopoopo e faatino ai meafai i totonu o aoga taitasi.
Peitai o se tasi la lenei o fuafuaga sa masani ona faatulaga e komiti faafoe a aoga, ae o lea ua aapa atu le Matagaluega e faataatia se fua ia laugatasia uma ai aoga a le malo, ma faataatia ai loa le tapu lenei, ia lē toe faia ni saoga o meaai i aiga o fanau aoga.
