Ua aulia e le faalapotopotoga o atina’e tau pisinisi laiti a le Pasefika i Saute poo le South Pacific Business Development i Samoa le SPBD le 25 tausaga talu ona amata lana fesoasoani i lo tatou atunuu o le nonō atu o ni seleni mo pisinisi a nisi o tinā i faalapotopotoga i nisi o nuu ma afio’aga.
O se auaunaga ua faaalia e le faalapotopotoga ua manuia ai nisi o aiga i pisinisi laiti a tinā.
O le tasi lea o polokalame na aumai ma faagaioia i Samoa ua faalautele atu i atunuu e pei o Tonga, Fiti, Solomona ma Vanuatu.
O le faailogaina o le Iupeli Siliva poo le 25 tausaga o lea polokalame o le a asia ai e sui o le SPBD taumafaiga tau pisinisi a tinā i nuu ma afio’aga ma faailoa ai faamanuiaga ua maua e ia tinā o le atunuu ona o nonogatupe laiti mai le polokalame.
O le Aso Faraile e faia ai se savali i le taulaga a faalapotopotoga a tinā i le atunuu o loo auai i le polokalame, ma o le a faailoa ai foi atina’e tau pisinisi laiti a tinā ua ausia le tulaga maualuga i le lelei ona faafoe ma manuia ai aiga.
