O le uluai taimi lenei ua faamanatuina ai i le atunuu lenei aso faapitoa i le lalolagi lea o loo faafoeina e le Pulega o Tagata Tafafao Maimoa mai Fafo.

O lenei faamoemoe na tatalaina aloaia lea e le Minisita Lagolago Afioga Faleomavaega Titimaea Tafua e faalauiloa ai le tāua o lenei aso mo fanau aoga na valaaulia.

“O le auga ma le faamoemoe o lenei aso faapitoa o le faamanatu ma le faalauiloa atili o le tāua o lenei alamanuia i le atina’eina o le atunuu i le lalolagi atoa faapea foi le taumafai e siitia le faatumauina o aganuu faapea agafesootai.

“O lenei aso faapitoa i lenei tausaga ua faamanatu faapitoa ai e le faalapotopotoga a Malo Aufaatasi i le lalolagi e moomia le siitia o alagatupe faafaigaluega a atunuu o le lalolagi mo lenei alamanuia ina ia vave faaleleia ma siitia atili lenei atinae.

“O se agavaa lelei foi lea e toe faatalanoa atili ai nisi o paaga  mai fafo auā le taumafai e siitia nisi alagatupe e faaleleia ai atinae.”

O le polokalame o lenei tausaga na faaalia ai e Faleomavaega ua iai le manatu o le Pulega ia auai mai fanau ma tupulaga talavou.

“O se avanoa lelei lea e faalauiloa atu ai auaunaga eseese i totonu o lenei alamanuia e mafua ai le aogā o le galulue ai i le vave aoaoina o alo ma fanau i lenei mataupu tau turisi e pei ona taulamua ai nisi o aoga.”

Saunoa foi le Pule Sili o le Pulega o Tagata Tafafao Maimoa mai Fafo, Pativaine Petaia-Tevita e tusa ai o le auina mai o fanau ina ia maimoa ma tapue vaega tāua o lenei faamoemoe.

“O le auai mai o fanau e aoga lea ma patino ai foi lenei aso auā e iai mataupu e mafai ona aoaoina e agai i lenei vaega auā afai ae aoaoina o le a tele le fesoasoani mai lenei aso e malamalama ai fanau aoga i alamanuia e mafai ona atinae ai i latou ma o latou aiga i le lumanai.”

O le isi foi vaega tāua o lenei aso faamanatu o le faatāua lea o la tatou siosiomaga.

“O le siosiomaga mo tatou lava ia e ese le tāua, o lea lava matou te pepese atu lava i aso uma faamamā ma faamatagofie la tatou atunuu.

“E leai ni tatou tupe se tele e pei o isi atunuu ae a mamā ma matagofie lo tatou atunuu o le a avea lea ma auala ma fiafiaga o tagata e malaga mai iinei ma aumai a latou seleni i totonu o Samoa ma lona tamaoaiga.”

O le a taumafai foi le Pulega e faaauau ona faamanatu lenei faamoemoe i tausaga taitasi e pei ona ta’ua e Tevita ona o le naunautaiga ina ia aua ne’i motusia le auga ma le faamoemoe o lenei aso faapitoa.