O le Aso Faraile nei o le a faatāua ai le aso faapitoa faavaomalo mo tupulaga talavou poo le International Youth Day ma ua faalauiloa foi tapenaga a se tasi o sui tamo’e mo le tofiga pulenuu a Aukilani ia Efeso Collins mo talavou i lea vaega o Niu Sila.
O le ulutala o lenei tausaga e faaupuina faapea “Leave no one behind” poo le aua ne’i tuua se tasi ma e alagatatau lelei lenei ulutala i fuafuaga a lea tamalii Samoa e ala i ana tapenaga mo le faamoemoe o loo loma nei.
Ta’ua e Efeso i se pepa o faamatalaga o le tepa taula’i o ana fuafuaga mo tupulaga talavou ina ia mafai ona faasoa o latou mana’oga, faaleo o latou manatu ma ia una’i ai lo latou auai i polokalame mo ta’ita’iga lelei i le lumana’i.
O se tasi o fuafuaga a Efeso ina ia mafai ona faatū se laulauafono poo se Youth Governing Board e mafai ai e tupulaga talavou ona faasoa o latou agavaa faaleta’ita’i ma mafai ai ona vaavaai i latou i nisi o galuega faapalemene.
O le una’i a lenei tamalii ina ia mafai ona faaleleia agavaa a tupulaga talavou i Aukilani mo so latou lumana’i manuia.
