Ua faamanatu le 50 tausaga o le Iuni lakapi a Samoa i Ueligitone. Ua faailoa i lipoti mai le leitio faavaomalo a Niu Sila o lea faamoemoe o le a faamanatu i le Labour weekend ma o se faamoemoe tāua tele. 

Saunoa le peresetene o le Iuni, Ken Ah Kuoi i se faatalanoaga ma le leitio, e faapea o loo malosi lava le latou iuni ma e faafetaia foi ma faatāua le sao o nai tuaa ua tuanai i le faatuina o lenei iuni, e le gata i lo latou naunautaiga ma moemitiga mo le taaloga lakapi ae faapea foi i le aganuu lava ia a Samoa.

Fai mai Ah Kuoi e oo mai i le taimi nei o loo tauave pea ia naunautaiga e le Iuni e ala i le faia pea o lotu e pei ona masani ai a o sauni se faamoemoe atoa ai foi ma le faatumauina o le faaaogaina o le gagana ma tu faale aganuu.

Tele le sao o le iuni i alo ma tupulaga talavou i lea tausaga ma lea tausaga. E 9 aulakapi a le Pasefika o le a malaga mai Aukilani, Waikato, Bay of Plenty e auai ai i le faamanatuina o le 50 tausaga.