O le mae’a ai o le fonotele i Malua na alo ai sui o le vasega 6 muamua poo le Form 6 a le Kolisi o Leulumoega Fou, e faamanatu le atoaga o le iupeli auro poo le 50 tausaga talu ona faavae le vasega 6 muamua a lea kolisi maualuga a le Ekalesia Faapotopotoga Kerisiano Samoa.

O nisi o le vasega 6 muamua o faifeau e pei o le susuga i le toeaina susuga Alosina Leatualevao Vavae ua malolo penisione i le fonotele i Malua o le tausaga nei, o le susuga Dr Apelu Po’e , ma le susuga Apelu Tielu.

O se tasi o lea vasega o le tamaitai e toatasi le faletua le afioga Peseta Vaaelua Tialuga Sunia Seloti mai Amerika Samoa.

Sa maua le avanoa e fesiligia ai nisi o le vasega 6 muamua a le kolisi o Leulumoega le susuga Apelu Tielu ma le susuga Tufeao Fanolua i le aulia o le 50 tausaga talu ona aoaoina i le kolisi, ma le tulaga sa iai aoaoga i lea vaitau i totonu o le kolisi o Leulumoega Fou.

Susuga Apelu Tielu ma Tufeao Fanolua o nisi o le vasega 6 muamua a le Kolisi o Leulumoega Fou.