O le Aso Sa muamua o lenei masina o Oketopa ua avea ma aso sa talosia ai galuega a faia’oga uma i lo tatou atunuu, i latou o loo feagai ma le faafaileleina o le ola a’oa’oina o alo ma fanau a Samoa.
O le faai’uga o le vaiaso sa faailoga ai le aso faavaomalo o faia’oga i le lalolagi, e pei ona sa avea ai le sauniga lotu na faia i le malumalu o le Ekalesia Faapotopotoga Kerisiano Samoa i le afio’aga o Apia, ma sauniga e momoli talosaga ai le Matāgaluega o A’oga ma Aganuu ina ia sao ma uli galuega a faia’oga i lenei tausaga aemaise o le faaauauina pea o le latou auaunaga i totonu o a’oga a le malo, a’oga a ekalesia ma aoga tuma’oti o loo tautua ai.
O le Minisita o A’oga ma Aganuu sa fai ma sui o le malo e momoli le faafetai i faia’oga uma i le atunuu i lea sauniga ae sa momoli foi lana faamanuiaga i le faailogaina o le aso faavaomalo o faia’oga i lenei tausaga.
Se vaega o le faamanuiaga mai le Minisita o A’oga ma Aganuu, afioga Aiono Alec Ekeroma i le faailogaina e Samoa o le aso faavaomalo e manatua ma amana’ia ai pea le galuega ma le tautua a faia’oga.
