O se fonotaga faapitoa a le Kapeneta na faia i le aso ananafi, Aso Gafua, na faamaonia ai le faaiuga ina ia faamalolo lē tumau le Ofisa Sili ma le Sui Ofisa Sili Lagolago o le matagaluega o pisinisi, alamanuia ma leipa.
O le afioga Pulotu Lyndon Chu Ling o le Ofisa Sili o lea matagaluega ma le afioga Tofilau Matthew Alesana o le Sui Ofisa Sili Lagolago i lea lava matagaluega i le vaega o loo gafa ma le polokalame o loo auina atu ai i atunuu i fafo tagata faigaluega mo galuega faavaitaimi (RSE).
O lenei faaiuga ua faia ina ia mafai ai ona faagasolo saoloto se suesuega i le lotoifale o le matagaluega i mataupu lava e faasino i lenei polokalame o galuega faavaitaimi aemaise ai o loo fia sailia poo le pule a ai na toe faataga ai se malaga na alu ese mai Samoa i le aso 15 o le masina talu ai o Ianuari, mo tagata faigaluega faavaitaimi, ae semanu ua mae’a ona faataatia le faaiuga a le malo, ina ia faamuta uma i malaga o Tesema lenei polokalame, ae se’i toe faatulaga lelei e le malo ma le matagaluega ni faiga faavae e paepae lelei ai lenei polokalame o loo aogā mo le tamaoaiga o le atunuu.
I le pepa o faamatalaga mai le Ofisa So’oupu a le Kapeneta o loo aumaia ai lenei faaiuga:
“Ua faamaonia e le Kapeneta le faamalolo lē tumau ai o le Ofisa Sili o Pulega, o le Matagaluega o Pisinisi Alamanuia ma Leipa – Pulotu Lyndon Chu Ling ma le Sui Ofisa Sili Lagolago mo le Vaega o Galuega Faavaitaimi – Tofilau Matthew Alesana. O lenei faaiuga ua faia ina ia aualā ai le faatinoina o le suesuega e fitoitonu i le Vaega o le Matagaluega o loo gafa ma le faafoeina o galuega faavaitaimi mo le atunuu.
E tusa ma ala o le Tulafono ma faiga faavae a le Malo, ua faasee atu le mataupu i le Komisi o Galuega a le Malo mo le faatinoina o le suesuega ma toe lipoti vave mai ai i le Kapeneta mo sana faaiuga mulimuli.”
O le afioga Pulotu ua faatolu nei ona tofia ai pea o ia i lea tofiga o le Ofisa Sili, e pei ona tofia ai i le tausaga e 2016 e le pulega a le faigamalo talu ai, ae o le masina o Novema i le tausaga talu ai na toe filifilia ai e le faigamalo fou ua tulai mai nei, ina ia faaauau pea i lona tofiga mo lenei Matagaluega o Pisinisi, Alamanuia ma Leipa, ma o lea o loo iai i lalo o le latou vaaiga le polokalame mo galuega faavaitaimi, poo Regional Seasonal Employment.
O le a toe faalautele atu lenei lipoti i se taimi o i luma.
