Ua faamālōlō mo se taimi lē tumau le faipule ia Gaurav Sharma mai le pati a le Labour.

O le faai’uga lea a le pati na faailoa mai e le palemia, Jacinda Ardern, i le aso ananafi ma aloa’ia ai lava ananafi.

Saunoa le palemia o se faai’uga tatau ma e lē o aafia ai le tauave pea e le faipule o Hamilton i Sisifo o lona itumalo i totonu o le Palemene, peitai e lē toe auai i fonotaga a le pati poo nisi lava o polokalame e aunoa ma le ioe muamua o le Labour.

O se faai’uga e faapea na autasi iai le to’atele, ma e lē o fiafia ma tiga le faafaletui ona o tuua’iga ua faasalalau e Sharma i luga o le Facebook.

Na sau ai foi ma le tala e augofie le Labour e toe iloilo i soo se taimi tuutuuga ua faamālōlō lē tumau ai Sharma pe afai ae alualu ae faaauau pea ona soli e Sharma tulafono.

E toe iloilo le faai’uga a le Labour i le masina o Tesema, ma o loo tumau lava le teena e le Labour o tuua’iga a Sharma o loo bully ia ma isi faipule i totonu o le pati.

E ese mai lona tofi o se faipule o le Palemene, o le susuga Gaurav Sharma o se alii foma’i. E iai lona faailoga o le Bachelor of Medicine and Surgery mai le iunivesite o Aukilani ma le Master of Business Administration mai le George Washington University.

O le tausaga e 2020 na filifilia ai Gaurav Sharma e avea ma Faipule o Hamilton West i totonu o le Palemene a Niu Sila mo le Vaega Faaupufai a le Labour.