O upu a le pese e masani ai Samoa e faapea, Ua faafetai, Ua faafetai, Ua malie mata e vaai. Ua tasi lava oe, Ua tasi lava oe, Manu Samoa i o matou nei faamoemoe. 

E ui ua lē ausia e lau Manu Samoa le tumutumuga ma le auga o aute o le faagatama o le lakapi o le Ipu o le Lalolagi e pei ona faagasolo nei i Farani, e ui foi e lei manuia lana taaloga mulimuli ma le ‘au malosi mai Egelani, ae ua faamalieina ma le loto fiafia le maimoa ma le silasila a le atunuu i le faatinoina o lana taaloga e pei ona iai i le vaveao o le Aso Sa.

Ua tolu malolo sosoo a le Manu Samoa i lana Pool e pei ona faia’ina ai ia Iapani ma Argentina, ae o le taaloga lenei ma Egelani sa faatalitali ai loa le atunuu pe ono manumalo pe leai a o tau saili pea sona avanoa i ‘au e 8 pito i luga o le Ipu o le Lalolagi. 

Peitai o se taaloga na faate’ia ai le maimoa a le lalolagi atoa i le sasa a le Manu ina ua mae’a le taaloga e tasi le ‘ai o loo sili ai Egelani i ‘ai e 18 i le 17 a le Manu Samoa.

O Egelani o loo tulaga 6 i ‘au pito i luga o le faagasologa o ‘au a le lalolagi ae o le Manu Samoa o loo tulaga 14. 

Faaalia i luga o upega tafailagi ma nisi o faatalatalanoaga finagalo fiafia o le tapuaiga a le mamalu o le atunuu e tali faafetai atu ai i le faiaoga ma le pulega faapea alo ma tamafanau o Samoa na latou tauina le taua o mafaufauga o le lakapi o le Ipu o le Lalolagi i le latou loto atunuu loto aiga ua siitia ai pea le maualuga o le faatinoina e Samoa o lenei taaloga. 

Ua malolo le Manu Samoa ae o loo tumau pea le faafiafiaina o le tapuaiga a le atunuu o Samoa i lana ‘au le Manu Samoa.