E 24 faalapotopotoga Tuma’oti a le Malo o loo i lalo o le ta’ita’iga a le afioga i le Minisita ia Hon Leatinuu Faumuina Wayne Sooialo, ae ua toe faaopoopo atu iai ma le isi faalapotopoto fou lea ua pasia nei e le malo ua ta’ua o le Pulega o oloa auina atu i fafo a Samoa 2024 lea ua 25 ai loa faalapotopotoga ua vaaia e le afioga i le Minisita ia Leatinuu. 

O le faalapotopotoga fou lenei o Pulega o oloa auina mai fafo a Samoa, ua pasia e le malo o se faama’ite a le afioga i le Minisita o Faatoaga ma Faigafaiva le afioga ia Hon Laaulialemalietoa Polataivao Schmidt ua una’ia ai le malo ma le Kapeneta ina ia iai se faalapotopotoga fou lenei e tatau ona tutoatasi ae mafai ona galulue faatasi ma le matagaluega o faatoaga ma faigafaiva.

I lalo o galuega tuma’oti a le malo na filifilia ai e le Kapetena ma faai’ugafonoina ai o le a faaaogā le faalapotopotoga fou lea i lalo o faalapotopotoga tuma’oti, (MPE) ae o lona faiga faavae, o lona faatinoina ma le faagaioiga ma lona galuea’iga e i lalo la o le Minisita o Faatoaga ma Faigafaiva. 

O le ese mai o le Samoa Export Authority i aso la ma aso nei ona o lea ua galulue faatasi ma le Matagaluega o le Va i Fafo, Matagaluega o Faigafaiva, Matagaluega o Tupe, i lalo lava o pisinisi alamanuia ma labour, ma o le malosi lea o le a tulai mai ai le auaunaga a le Pulega o oloa auina mai i fafo a le atunuu.

O le faagaioiga o lenei auaunaga atoa ma le vaaiga o le aufaigaluega o loo i lalo o le afioga i le Minisita o Faatoaga ma Faigafaiva ia Hon Laaulialemalietoa Polataivao Schmidt auā e tele lona silafia ma lona iloa e tāua le mea lea mo tatou tagata faifaatoaga.

E lē gata i le aufaifaatoaga ua maua a latou maketi ma o i fafo, ae aogā tele mo le aufaifaatoaga laiti.

E lē mafai ona latou faatinoina le aveina o se container i fafo, ae mafai ona omai ma faamaopopo e le faalapotopotoga lea ma mafai ai loa ona auina atu i fafo.

O le tilotilo foi a le afioga i le Minisita o faatoaga i le tulaga lea, ona o le toatele o le aufaifaatoaga e fai a latou faatoaga ma la’u i le maketi, auā e leai se isi mea e mafai ona ave iai a latou faatoaga e faatau ai.

Ae o le tāua o le faalapotopotoga lea, o Pulega o Oloa auina mai i fafo o le a mafai ona fesoasoani atili i le aufaifaatoaga a le tatou atunuu.