Ua tapena le malo i lana fuafuaga o le tala faatatau autū o le tupe lea ua taoto ne i le Palemene e faamae’a ona faamatuu atu le ta’i miliona tālā i Fono Faavae a itumalo faapalota e 51, lea e le’i mae’a ona tuuina atu i fuafuaga o lea poloketi i le nofoa’iga a le ulua’i faigāmalo a le Faatuatua i le Atua Samoa ua Tasi, e mafua ina ua faafuase’i ona faata’ape le paea’iga 17 a le Palemene ae e le’i mae’a lena paea’iga lima tausaga ua mavae atu.
I le folasaga a le tama’ita’i Minisita o Tupe, le afioga Mulipola Anarosa Ale-Molioo i le faataatiaina o le tala faatatau autū o le tupe mo le tausaga faaletupe 2025 i le 2026 sa ia faailoa ai o le a maua e itumalo le miliona valuselau afe tālā ona atoa ai lea o le lima miliona a le itumalo e pei ona sa folafola i le paea’iga talu ai a le Palemene.
O lea faasoa a le malo o le a faaalu ai se vaegatupe e 91 miliona 8 selau afe poo le 91 tesimale 8 miliona tālā.
O le tasi lea o fuafuaga o le atina’e o nuu ma itumalo sa avea o se tasi o faatosina mo le palota tele ua mae’a a o faagasolo faalauiloa a le vaega faaupufai o le Faatuatua i le Atua Samoa ua Tasi lea ua fuafua ai e siitia i le 2 miliona tālā o le a maua e le itumalo i le tausaga.
Ae i fuafuaga a le malo mo avanoa tutusa o tagata uma e saofagā ai i faamanuiaga tau tupe mai le penisiona mo tamā ma tinā matutua faapea tagata e iai aafiaga tumau, o le masina fou o Novema e pei ona faailoa e le Minisita o Tupe, o le a amata maua ai le siitaga o tupe maua mai lea faamanuiaga.
O le tasi lea o tapenaga sa folafola e le vaega faaupufai ua toe tusi aao iai le atunuu na te toe faaauau pe a toe avea ma faigamalo.
O fuafuaga o le tala faatatau autū o le tupe ua aofia ai lea fuafuaga e pei ona maua ai e tamā ma tinā matutua penisione ua aulia le 70 tausaga o le soifua le lima selau tālā i le masina, ae 300 tālā mo tagata e iai o latou aafiaga tumau.
