O le Aso Toonai, o le aso mulimuli lea sa faagasolo ai suega siamupini a le taamilosaga pasiketi ua faaigoaina o le Samoa Games lea oloo tauva ai ‘au a alo ma fanau a le atunuu mai Niu Sila, Ausetalia, Amerika Samoa ma Samoa nei.

O lenei taamilosaga o loo vaevaeina i le vaega o le Open Men, Open Women ma le Under 17.

Na ta’ua e le Peresitene a le Asosi Pasiketi a Samoa, Leiataua Talalelei Pauga, o lenei taamilosaga o le a filiina ai i latou o le a toleni mo nisi o taamilosaga tāua i masina o i luma.

“O le Samoa Games e filiina ai ‘au a Samoa e tapena ai e le gata i taaloga a le Pasefika aemaise ai taaloga a Asia lea e fuafua e faia i le masina o Iulai.”

“O le filiina o le ‘au pasiketi a le atunuu e fua lava i aiaiga o loo tuuina mai e le asosi o taaloga a Samoa e ao ona usitaia.”

Sa fesiligia ai i le tulaga o le faatupeina o ‘au a le atunuu mo nei faamoemoe, ae na ia saunoa o se faafitauli tele lea i le asosi.

“O le tulaga i mea tau tupe o se faafitauli lea mai le tele o tausaga.”

“Afai e faaaogā lava le utiuti o le seleni ma faamolemolega e atina’e ai lenei taaloga e uma lava le soifuaga o faapea ai lava.”

“Mo matou o loo unaia le atina’e o lenei taaloga ua tele lo matou sao ma lo matou malosi ua alu, o tupe mai a matou taga ma suegatupe ma aisiga lea o loo matou faaaogāina e atina’e ai le pasiketi i Samoa.”

Na faafetaia ai le Peresitene le seleni mai le asosi o taaloga a Samoa e fesoasoani ai i lenei faamoemoe.

Ona o le pepesi o le Koviti-19 i tausaga ua mavae lea sa le mafai ona faaauauina ai polokalame masani a le asosi mo aoga ma nuu i tua.

“Ua leva ona faatino polokalame a le asosi mo aoga i nuu i tua e amata mai i aoga tulagalua faasolo mai ai i taamilosaaga a Kolisi.”

“Pau le faafitauli o malae e patino mo le taaloga pasiketi o lea e talosia ai ia a’e se tofa i le malo e maua ai se fesoasoani e faatino ai nei vaega mo nai afioaga i tua e faigofie ai.”