O le tofa ia Tuiloma Neroni Slade  o se tasi o uluai tama fanau a le atunuu ma le Pasefika na filifilia ma faamasino o faamasinoga o soligatulafono o le lalolagi o lea ua faailoa lautele sona finagalo i le faaiuga a le faamasinoga maualuga lea na fofogaina i le Aso 28 o Iuni.

O lea faaiuga na faaleaogaina ai le faatautoga a faipule filifilia e toa 26 o le vaega faaupufai o le Faatuatua i le Atua Samoa ua Tasi atoa ai ma le aiaiga na aumai i lea faaiuga e usuia loa le Palemene e tusa o le Poloaiga a le Ao o le Malo i le Aso 20 Me 2021.

O le iuga foi lea ua faailoa ai e le faamasinoga maualuga o le a toe asiasi le mataupu  o le faatautoga i lalo o aiaiga faaletulafono le “principle of necessity” e aloaia ai loa le faatautoga pe a lē usitaia e le Loia Sili a le malo le faatonuga e logo tagata uma o le malo e aofia i tapenaga o le usuia o le fono aoao faitulafono.

 O le finagalo o Tuiloma Neroni Slade ua salalau i le lomiga a le niusipepa a le Samoa Observer o loo ia faamanino ai i lona tomai ma le silafia o se loia sinia ma sa avea foi ma faamasino o faamasinoga faavaomalo i Hague o loo ia fautuaina ai e tatau ona faaaloalo ma usitaia e tagata uma, mai lava i le Ao o le Malo e oo i le lautele o le atunuu le tulafono ma le faaiuga fai a le faamasinoga.

Ua faaali foi e Tuiloma, o Samoa o lana talafaasolopito o lana faigamalo faatemokarasi e leai ni pulega faatupu e tutasi ai le pule o le Ao o le Malo poo se isi tofiga mamalu ma tauoloa o le malo ona o loo maioio le tulafono faavae o le malo tutoatasi o le faamasinoga o le taunuuga lea o soo se finauga faaletulafono ma e tutasi foi lana faaiuga.

O faamasinoga na feagai ma le suesueina o le mataupu na talosaga ai le Loia Sili a le malo ina ia faia se poloaiga e faaleaoga ai faaletulafono le aloaia o le faatautoga o le faleie o i latou o ni tamalii ua filifilia e avea ma faamasino ua iai agavaa ma le faautautaga e faafoe ai iloiloga o mataupu tau tulafono.

O le talosaga a le Loia Sili ua faaalia e Tuiloma sa matua suesueina i tulaga uma tau tulafono ma sa faamalieina foi aiaiga faaletulafono o loia uma o itu auai na finauina mau na faavae ai a latou finauga.

O le faaiuga atoa o le mataupu ua fautuaina e lea tamalii ua leva tausaga ua avea ma loia sili o le malo o Samoa e ao ona faitau mae’ae’a iai ma  o loo matua manino poloaiga na tuuina mai i le usuia o le palemene i totonu o le 7 aso ina ia faamalieina ai aiaiga o le faavae e faasino i le poloaiga a le Ao o le Malo i le Aso 20 o Me ina ia tauaofia loa le fono aoao faitulafono  i le Aso 24 o lea lava masina.

O le maea o le 45 aso o loo aiaia i le faavae, faaalia e Tuiloma o se isi lea vaega taua o le vaega 52 o le faavae a Samoa mo le taloina o le tauaofiaga o le palemene e pei ona faatonu mai e le tulafono faavae. O le mafuaaga foi lea o le aumai o le faaiuga ina ia usuia loa le fono aoao faitulafono i totonu o le 7 aso lea na maea i le Aso Gafua o lenei vaiaso.

Ua faaulu atu nei e le Loia Sili a le malo se talosaga i le faamasinoga o talosaga apili ina ia toe iloilo ai lenei faaiuga e faasino i poloaiga na tuuina mai. E le’o iloa se aso e valaau ai lea talosaga apili a le loia sili a le malo.

O le faaiuga a le faamasinoga maualuga i le poloaiga a le Ao o le Malo i le Aso 20 o Me o loo faatumauina pea lona malosi faaletulafono ona e lei toe apiliina le faaiuga na faaaoga ai e le faamasinoga le malosi o lea poloaiga na faatonuina ai le usuia o le Palemene i le Aso 24 o Me.

Peitai e pei ona silafia o le malelega o le po o le Aso Sa 4 o Iulai na toe faaleaoga ai e le Ao o le Malo lea poloaiga ae faatonuina le Palemene e tauaofia i le Aso 2 o Aukuso ma lana saunoaga e faa ono toe iai se isi fesuiaiga e fai fuafua i nisi tulaga e toe aliali mai.

O loo tālia se isi finagalo o le faamasinoga i le faatautoga i totonu o le faleie na faatino i le aso mulimuli o le 45 aso o loo aiaia i le faavae e tatau ai ona tauaofia le fono aoao faitulafono i le maea o le palota tele e faatautō ai sui filifilia o itumalo na tusi aao ai tagata palota o itumalo e 51 o le atunuu i lana faiga filifiliga i le Aso 9 o Aperila 2021.