Ua faaleo popolega o le malo tele o Amerika i le isi ituaiga variant fou o le koviti lea ua aliae, fai mai o se isi ituaiga lava o le omicron ma e faaigoa le XBB.1.5 lea ua fautuaina ai nei tagata lautele ma faia iai suesuega. 

I le masina lava ia na tea nei o Tesema sa faamauina ai o tagata na aafia i le ituaiga fou lea na siitia mai le fa pasene agai i le 41 pasene ma o se siitaga maualuga tele lea e pei ona saunoa iai se fomai mai le falepaepae i Amerika ae tali tutusa lava foi ma le faamatalaga mai le faalapotopotoga o le soifua maloloina o le lalolagi le WHO.

Ua o latou faailoa o le XBB.1.5 na muai faamauina i totonu o Amerika ma ua pepesi atu i isi atunuu e 29 ma e faigofie tele ona pepesi.

Fai mai fomai o loo feagai ma suesuega e le o manino i le taimi nei pe sili atu ona ogaoga lea ituaiga ona o loo faia nei suesuega ae o le faamanatu foi ina ia faia e tagata uma gaioiga e malupuipuia ai mai le isi variant fou lea ina nei aafia le soifua.