O le fono a faalapotopotoga tau fesootaiga a Malo o le Taupulega o loo usuia i Lonetona i Peretania i le vaiaso nei, na ave ai se leo o Samoa e ala atu i i le Minisita o Fesootaiga ma Faamatalaga Faatekonolosi ua fautuaina ai fesootaiga tau tekonolosi o le Meta ma le Google, ina ia galulue faatasi ma auaunaga tau fesootaiga a Malo o le Taupulega e tafi ma aveesea ai fesootaiga ma’ale’ale ma faapa’ia mata.
I se faasalalauga i le leitio a lo tatou Malo o loo faailoa ai, e lei alo ile ata o le niu le saunoaga a le Minisita le afioga, Toelupe Poumulinuku Onesemo, ona sa ia tuu sa’o lava i le aofia o usu fono sa auai ma ia saunoa pe afai o iai i le fono ni sui o fesootaiga televavave o le Meta ma le Google ua tatau ona faailoa atu se auala e fesootai ai, ma faatalanoa manaoga o loo fia faatino ai le aveesea o faiga solitulafono mai fesootaiga faaona po nei le social media.
O le naunautaiga a le Minisita e pei ona faailoa i lea faasalalauga, o le tau atu i ia auaunaga tetele tau fesootaiga, o Samoa le isi atunuu o loo lotolotoi i taumafaiga e taofia ai faiga solitulafono i auala o fesootaiga ua alumia ma faaaoga e le lalolagi i le taimi nei. Na faailoa foi e le afioga Toelupe i le fonotaga taumafaiga i Samoa o loo faasolo i aoga ua faapupula atu ai i tupulaga le ogaoga o ia faiga solitulafono i fesootaiga faaonapo nei, ma auala e taofia ai.
O le vaiaso atoa lenei sa faagasolo ai lea fonotaga e pei ona filifilia ai le Minisita o Fesootaiga ma Faamatalaga Faatekonolosi e sui taitaifono i se tasi o fono tau fesootaiga a Malo o le Taupulega.
