Tusia – Maina Misa Fomai – Vai
O se pepa o faamatalaga na lafoina mai i le Komiti o Faalavelave Tutupu Faafuase’i o loo faaalia ai le faaleaogaina o le fitu aso faanofoesea na pasia e le Kapeneta, ae ua toe faaauau atu i le 10 aso mo le pasese o le aso 29 o Mati lea na taunuu mai Niu Sila.
O le mafuaaga o lea fuafuaga ona ua māua tagata e toafā mai le pasese e 219 i le vairasi o le Koviti-19. E le gata i lea o le toe taga’i ai o le malo i le tulaga pepesi o lo’o iai le faama’i i le taimi nei i le atunuu, lea o loo faatupulaia pea le numera o e aafia ma ua silia i le 1300 o loo aafia i le taimi nei fua i suesuega(tests) na faatinoina a i latou.
O le 7 aso faanofoesea na pasia e le Kapeneta ma faailoa mai i le saunoaga a le Afioga i le Tamaita’i Palemia o Samoa ia Fiamē Naomi Mataafa. O le ulua’i pasese mai le aso 29 o Mati lea na fuafua e faamalosia ai lea poloaiga peitai, ua toe suia nei.
O le Aso Lulu 30 o Mati lea na faamauina ai le tagata muamua ua maumau le soifua ma o loo ua faamaonia mai e le Komiti o aafiaga o le Koviti lona mafuaaga. E tusa ma le 166 i latou fou na māua i le tā o le 2 i le aoauli ananafi ua aafia i le Koviti, ae toafā na maua i suesuega sa aafia i le Koviti muamua ae ua mate le vairusi.
E tusa ma le 49 ua aafia i Savaii e le o iai lava se tasi ua aafia i Manono ma Apolima e pei ona lipotia. Ae toalima o loo faanofoesea i Motootua, e leai se tasi o taofia i le potu tigaina.
