Ua faailoa i lipoti mai Niu Sila i auaunaga tau tagata tafafao maimoa atu i le atunuu, e to’atele tulisi ma le au asiasi faavaomalo ua faalēaogāina faigāmalaga atu i le atunuu ona o vevesi i Sasa’e Tutotonu.
O le i’uga lea o se su’esu’ega sa faia ua faailoa ai e le Tourism Export Council ma lipotia i le RNZ, e 77 pasene o tagata na tali ane i le su’esu’ega ua o latou faailoa sa iai a latou tagata tafafao maimoa ane i le atunuu mai le United Kingdom ma Europa ua faalēaogāina faigāmalaga mo Mati ma Aperila ona fai mai a latou faamatalaga e māfua ona o faigāmalaga sa fuafua e faimalaga ane ai ua faaitiitia avanoa ae o isi foi faigāmalaga e ui ane i nofoaga i Sasa’e Tutotonu o loo aafia i le vesiga i Sasa’e Tutotonu.
Fai mai le auaunaga tau tulisi e lē o se tala lelei lea mo Niu Sila ae faamoemoe e ono iai nisi avanoa e alia’e mai tulisi ma le au asiasi mai Kanata ma Amerika ma isi atunuu e ono fia malaga mai i Niu Sila ma e tāua tele foi le faaauau pea o le faafeiloa’ia e Niu Sila o tagata asiasi mai faavaomalo.
Fai mai le ofisa o Tulisi o le malosi o sootaga ma paaga faavaomalo i itu tau fefaataua’iga o le ki lea e faamautinoa ai e maua se isi fesoasoani i lea tulaga.
Puna o Faamatalaga: https://www.rnz.co.nz/news/national/590370/uk-and-european-visitors-cancel-trips-to-new-zealand-amid-middle-east-conflict
