Ua faaleaoga ma soloia i se faaiuga a le faamasinoga o tagi tau palota, moliaga e lua o le ave o taumafa i le faamoemoe o se faatosina i tagata palota o Vaimauga 3, sa tuua’ia ai le sui faipule le afioga Lautimuia Uelese Vaai, ina ua talia e le faamasinoga le finauga a le loia mo le itu a le faipule, e leai ni mau e lagolago ai ia moliaga a le itu tagi lea o loo finau mai ai le loia a Samau Leatigagaeono Solitamalii Timani.

O le toe faaauauina o taualumaga a le faamasinoga o palota i le Aso Lulu, na tatala ai i le suesueina o le talosaga a le itu a Lautimuia sa finau ai lana loia e leai ni mau a le itu tagi e lagolago ai a latou moliaga o faiga faaalatua le bribery faasino i le lima afe tala na ave i le nuu ma le itumalo i le faalauiloa a le vaega faaupufai o le Faatuatua i le Atua Samoa ua Tasi, ma moliaga o faatosina e ala i le saunia ma le ave o taumafa i tagata palota i le aso o le faalauiloa poo moliaga ua ta’ua o le treating. 

Peitai o le mae’a ona suesue o le talosaga nei ma tuuina atu finauga a loia a itu auai, na maua ai le faaiuga e soloia moliaga e faasino i le ave o taumafa ona e leai ni mau maumaututu e lagolago ai, ae faaauau ona suesue moliaga e lua o faiga faaalatua faasaga i le faipule e faasino i le lima afe tala, ona e iai vaega o ia tuuaiga e tatau ona tali iai le itu ua tuua’ia.

E mae’a suesuega o le tagi tau palota i le aso lona lua ua mae’a molimau tali a le itu a le faipule e tetee ai i moliaga o le bribery, ae amata molimau a le itu o loo faasaga iai le tagi tau palota, e lagolago ai a latou moliaga o faiga faalatua lea o loo tuua’ia ai le faipule o le itu faaupufai e puipuia aiātatau a tagata le tofa Lealailepule Rimoni Aiafi e faasino i lona ave o ni tupe tai selau tala i ni tagata palota se toalua.

O loo molia ai foi le itu na faauluina le tagi i le lima selau tala na ave i nisi o tagata palota, i le aso na momoli atu ai le sui tauva o loo taulamua i moliaga faasaga i le sui faipule o Vaimauga 3.