Ua faaleaogaina e le Faamasinoga Maualuga le talosaga a Fepuleai Atilla Ropati, lea na tuuina atu i le Faamasinoga Maualuga, ina ia tuuina mai se poloaiga e faamanino ai o loo avea pea o ia ma Peresetene o le Faamasinoga o Fanua ma Suafa. E le gata i lea ia faitauina ma faauiga atu e le faamasinoga le tulaga tonu o le fuaiupu 67(6) o le Tulafono o Fanua ma Suafa 2020.
O lea talosaga na afua mai ina ua tuuina atu se tusi mai le Afioga i le Tamaita’i Palemia o Samoa Afioga Fiame Naomi Mataafa, e faailoa atu ai i le Peresetene, ua mae’a sainia e le Ao o le Malo le Tulafono o Fanua ma Suafa 2020 lea sa faasolomuli ina ia faia iai teuteuga i tulaga o loo lē atoatoa ai lea Tulafono mo lona faaaogaina.
O lape i lea Tulafono, ua le mafai ai ona aloaia tofiga e pei o le tofiga lea o le Peresetene o Fanua ma Suafa, ona e lei mafai ona tuuina mai vaega e aiaia ai le filifilia o tofiga nei, mai le Tulafono o Fanua ma Suafa 1981 lea ua faaleaogaina.
O le tali atu a le Loia Sili o le Malo o Samoa i le talosaga a le Afioga Fepuleai e faapea ua mae’a ona faauiga mai e le Faamasinoga le fuaiupu 67(6) o le Tulafono o Faamasinoga o Fanua ma Suafa 2020 i le Faamasinoga o le aso 14 o Aperila, 2022.
O lena faaiuga na tuuina mai ai le amanaia e le faamasinoga o tofiga na faia i lalo o le Tulafono o le 1981, atoa ai ma mataupu na faila atu i le faamasinoga o Fanua ma Suafa a o lei faaaogaina le Tulafono o Fanua ma Suafa 2020.
E aofia ai foi ma tofiga o Faamasino lea na tuuina atu ai loa e le Faamasinoga mataupu o loo aafia ma sa faato’ai atu a o faaaoga le Tulafono o Fanua ma Suafa 1981 na pau ia o mataupu e mafai ona faia iai galuega ma au iai le malosiaga o faamasino e tagofia ai, seia mautu se tonu i le Tulafono o Fanua ma Suafa 2020 lea sa faasolomuli.
Talu ai la lea tulaga ua talafeagai ai i le malo ona tofi se peresetene i lalo o le faavae. Ua mae’a ona sainia e le Sui Ao lea tofiga ma ua faatali nei i le faatautoina.
I lana faaiuga i le asō o loo tagai ai le Faamasino Sili Afioga Satiu Simativa Perese i le ala o mea o loo faatulaga atu e le Loia Sili a le malo, o loo maua ai fuafuaga ina ia foia le faafitauli o le tele o mataupu ua tuua ma ua anoanoai i le Faamasinoga o Fanua ma Suafa ona o le tulaga o loo iai nei.
Sa faamanino e le tamaitai Loia Sili, Susuga Su’a Helene Wallwork Lamb, o le tofia ai o le Peresetene fou mo le Faamasinoga o Fanua ma Suafa e le gata o le a amata ai le Faamasinoga i se faagasologa fou o le a faatulaga mai e le Tulafono ma le Faavae, ae o le a atoa ai foi ma le itutino o le Komisi o Faamasinoga o Fanua ma Suafa lea e galulue e filifili faamasino o le Faamasinoga.
O lea faiga o le a iai lea pe a tuuina i totonu o le Tulafono o Fanua ma Suafa 2020 tulaga ma aiaiga e filifilia ai Faamasino, ma o le a talanoaina ia teuteuga ia Tesema o le tausaga nei i le Palemene.
O le finauga foi a le Tamaitai Loia Sili e tusa ai o le fesiligia o le manaoga mo se Peresetene fou, na ia faailoa ai e le o i le Tamaitai Palemia se malosiaga e faamalolo ai, peitai o loo i le Tulafono. O ia mafuaaga ua faaleaogaina ai le talosaga a Fepuleai Atilla Ropati.
