O loo vaaia pea foliga loulouā o le tau, ma le agi mai o matagi malolosi mo le tele o faaitu o Niu Sila.
Ma ua molimauina le tele o faaitu o le South Island ma vaega o North Island ua matua’i faaleagaina, ua to’atele ai aiga ua aga’i ese mai o latou fale.
I le itu i Mātū o Canterbury e faamauina le faasaoina mai o se aiga i Oxford ina ua faaleagaina le tauluga o le latou fale ma molimauina le tele o lālā laau ua pa’u’ū atu i totonu o le fale; faamatala le laki o le leai o se isi na matua’i aafia i lea faafitauli.
Faailo foi e le aiga le lagona o le lē mautonu ina ua aafia lo latou fale.
I lipoti mai le Newstalk zb, o lea ua amata tapenaga o le fale a sia aiga, ma ua fesoasoani atu iai le to’atele o tauaiga, ma o loo faanatinati gaioiga a o le’i toe agi atu matagi malolosi.
Ua faamauina foi i itu Saute, i le itu o Hanmer Springs o loo fetaia’i vaega o tineimū ma se mū i le vaomatua, ua ta’ua le mata’utia tele, ua faigatā lava ona tau tineia ona o le malolosi o matagi ua malosi ai le sasao o le afi.
Ma ona o le tetele o le sasao o lea afi, ua aga’i ese ai tagata o lea faaitu – e faapea pe ā ma le 50 aiga na aveese, e aofia ai le faletalimalo o le Braemar Lodge and Spa.
O loo faasolo pea galuega faatino o auaunaga i le tali atu i aafiaga o le tau.
Puna o Faamatalaga: https://www.newstalkzb.co.nz/news/emergency/canterbury-storms-rip-roof-off-oxford-home-as-winds-hit-150kmh/
